पुणे, ता. ३० : डॉ. बाबासाहेब आंबेडकर वसाहती परिसरात भररात्री कोयते हवेत फिरवत, घरांवर दगडफेक करून नागरिकांमध्ये दहशत निर्माण करणाऱ्या टोळीचा चंदननगर पोलिसांनी अवघ्या सहा तासांत पर्दाफाश केला. या कारवाईत चार आरोपींना अटक करण्यात आली असून एका विधीसंघर्षित बालकाला ताब्यात घेण्यात आले आहे. आरोपींकडून गुन्ह्यात वापरण्यात आलेला लोखंडी कोयता, दोन मोटारसायकलींसह एकूण १ लाख २० हजार ३०० रुपयांचा मुद्देमाल जप्त करण्यात आला आहे.
राहुल भास्कर वाणी (वय १८), अनिकेत देविदास वैरागर (वय २०), राहुल सुनील धुरंधर (वय २०) आणि प्रेम गणपती गरड (वय १८) अशी अटक करण्यात आलेल्या आरोपींची नावे आहेत. पोलिसांनी दिलेल्या माहितीनुसार, २३ जून रोजी पहाटे तीनच्या सुमारास तीन मोटारसायकलींवरून आलेल्या सहा ते सात जणांनी डॉ. बाबासाहेब आंबेडकर वसाहती परिसरात धुडगूस घातला. आरोपींनी हातातील धारदार कोयते हवेत फिरवत परिसरात भीतीचे वातावरण निर्माण केले. त्यानंतर त्यांनी स्थानिक नागरिकांच्या घरांवर दगडफेक करून दहशत माजवली.
या प्रकरणी चंदननगर पोलीस ठाण्यात भारतीय न्याय संहितेतील विविध कलमांसह शस्त्र अधिनियम, महाराष्ट्र पोलीस अधिनियम आणि क्रिमिनल लॉ अमेंडमेंट अॅक्ट अंतर्गत गुन्हा दाखल करण्यात आला होता. गुन्ह्याचे गांभीर्य लक्षात घेऊन चंदननगर पोलीस ठाण्याच्या तपास पथकाने तांत्रिक विश्लेषण, सीसीटीव्ही फुटेज आणि गुप्त माहितीच्या आधारे आरोपींचा माग काढला. त्यानंतर राहुल भास्कर वाणी (वय १८), अनिकेत देविदास वैरागर (वय २०), राहुल सुनील धुरंधर (वय २०) आणि प्रेम गणपती गरड (वय १८) यांना अटक करण्यात आली. तसेच या प्रकरणातील एका विधीसंघर्षित बालकालाही ताब्यात घेण्यात आले.
तपासादरम्यान आरोपींकडून गुन्ह्यात वापरलेला एक लोखंडी कोयता आणि दोन मोटारसायकली जप्त करण्यात आल्या. या मुद्देमालाची किंमत सुमारे १ लाख २० हजार ३०० रुपये असल्याचे पोलिसांनी सांगितले. चंदननगर पोलिसांनी ही कारवाई अत्यंत वेगाने करत अवघ्या सहा तासांत गुन्ह्याचा छडा लावला. या प्रकरणाचा पुढील तपास पोलीस उपनिरीक्षक किरण नरवडे करीत आहेत.
सदरची कामगिरी लीस आयुक्त अमितेश कुमार, पोलीस सह आयुक्त संजय दराडे, अपर पोलीस आयुक्त मनोज पाटील, पोलीस उपआयुक्त डॉ. प्रशांत अमृतकर, सहाय्यक पोलीस आयुक्त नुतन पवार, चंदननगर पोलीस ठाण्याच्या वरिष्ठ पोलीस निरीक्षक अश्विनी जगताप, पोलीस निरीक्षक गुन्हे अमोल धस यांच्या मार्गदर्शनाखाली सहाय्यक पोलीस निरीक्षक गणेश जगदाळे, पोलीस उपनिरीक्षक किरण नरवडे तसेच तपास पथकाचे पोलीस हवालदार गोणे, मेमाणे, डांगे, घावटे, घुटे, पोलीस अंमलदार लहाणेपाटील व गायकवाड यांनी केली आहे.
