पुणे: पुण्यातील रावेत येथील लंडन ब्रिजवर आत्महत्येचा प्रयत्न करणाऱ्या एका तरुणाचे प्राण पोलिसांच्या प्रसंगावधानामुळे वाचले. मात्र, या संपूर्ण घटनेत सर्वाधिक हृदयद्रावक क्षण म्हणजे आपल्या मुलाला मृत्यूच्या दारात उभे पाहून आईने केलेला आक्रोश होता. मुलाने व्हिडिओ कॉलवर आत्महत्या करण्याचा निर्णय सांगताच ती अक्षरशः कोसळली. मोठ्याने रडत, ओरडत आणि “असं करू नकोस” अशी विनवणी करत ती मुलाला थांबवण्याचा प्रयत्न करत होती. पण शेकडो किलोमीटर दूर असल्याने ती काहीच करू शकत नव्हती.
पोलिसांनी दिलेल्या माहितीनुसार, हा तरुण मूळचा बुलढाणा जिल्ह्यातील असून सध्या हिंजवडी परिसरात वास्तव्यास आहे. ऑनलाइन जुगारात सुमारे १५ हजार रुपये गमावल्यानंतर तो मानसिक तणावाखाली गेला होता. या नैराश्यातून त्याने रावेत येथील लंडन ब्रिज गाठला आणि पुलावरील संरक्षक जाळीच्या आत जाऊन उभा राहिला.
आत्महत्येपूर्वी त्याने आपल्या आईला व्हिडिओ कॉल केला. फोनवरून नदीचे पाणी दाखवत आपण आता उडी मारणार असल्याचे सांगितले. मुलाचे हे शब्द ऐकताच आईचा आक्रोश सुरू झाला. ती मोठ्याने रडत, किंचाळत त्याला वारंवार थांबण्याची विनंती करत होती. पण तिचे असहाय्य रडणे आणि विनवण्या ऐकत असतानाही तरुण आत्महत्येच्या निर्णयावर ठाम होता.
याचवेळी रावेत पोलीस ठाण्याचे पोलीस अंमलदार आशिष बोटके आणि दशरथ सदगीर नियमित गस्त घालत असताना त्यांची नजर या तरुणावर पडली. परिस्थितीचे गांभीर्य ओळखून त्यांनी शांतपणे त्याच्याशी संवाद साधला आणि योग्य वेळी हस्तक्षेप करून त्याला सुरक्षितपणे पुलाच्या कठड्यावरून खाली आणले.
यानंतर पोलिसांनी तरुणाचे समुपदेशन केले आणि त्याला कुटुंबीयांच्या ताब्यात दिले. पोलिसांच्या वेळेवर केलेल्या हस्तक्षेपामुळे एका आईची कुशी पुन्हा एकदा रिकामी होण्यापासून वाचली.
