फुरसुंगी : मेंढ्यांना रस्त्यालगतच्या खड्ड्यातील पाणी पाजल्याच्या कारणावरून झालेल्या वादात एका व्यक्तीने मेंढपाळाला शिवीगाळ करत दगडफेक केल्याची धक्कादायक घटना घडली आहे. ही घटना उरुळी देवाची येथील आदर्शनगर परिसरात नुकतीच घडली आहे. या दगडफेकीत दोन मेंढ्या गंभीर जखमी झाल्या असून, आणखी दोन मेंढ्यांना किरकोळ दुखापत झाली.
याप्रकरणी आण्णा लक्ष्मण मोटे (वय 50, सध्या रा. कचरा डेपो शेजारी, उरुळी देवाची; मूळ रा. मोडवे, ता. बारामती) यांनी फुरसुंगी पोलीस ठाण्यात तक्रार दिली आहे. त्यानुसार गणेश झांबरे यांच्याविरुद्ध फुरसुंगी पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, मोटे हे आपल्या कुटुंबासह मेंढपाळीचा व्यवसाय करतात. तीन दिवसांपूर्वी सासवड येथून मेंढ्यांचा कळप घेऊन ते उरुळी देवाची येथील कचरा डेपो शेजारी मुक्कामासाठी आले होते.
मोटे हे आपली भावजय सोनाली मोटे, भाचा सुनिल कोकरे आणि पुतण्या धनंजय मोटे यांच्यासह आदर्शनगर परिसरातील टेकडीवर मेंढ्या चारण्यासाठी गेले होते. यावेळी रस्त्याच्या कडेला असलेल्या खड्ड्यात पाणी दिसल्याने मेंढ्या पाणी पीत असताना गणेश झांबरे तेथे आला. “माझ्या पाण्याच्या खड्ड्यात मेंढ्यांना पाणी का पाजता?” असा जाब विचारत झांबरे यांनी शिवीगाळ करण्यास सुरुवात केल्याचा आरोप तक्रारीत आहे. मोटे यांनी “ती मुकी जनावरे आहेत, त्यांना पाणी पिऊ दे,” असे सांगितले असता झांबरे यांनी मेंढ्यांना हुसकावण्यासाठी दगडफेक केली.
या दगडफेकीत एका मेंढीच्या जबड्याला दगड लागून जखम झाली, तर दुसऱ्या मेंढीच्या मांडीला मुक्कामार लागला. आणखी दोन मेंढ्यांनाही किरकोळ दुखापत झाल्याचे सांगण्यात आले आहे. त्यानंतर मोटे यांना हाताने मारहाण करण्यात आली. त्यांना सोडवण्यासाठी आलेल्या सोनाली मोटे यांनाही ढकलून दिल्याचा आरोप आहे.
आता या घटनेनंतर जखमी मेंढीवर पशुवैद्यकीय डॉक्टरांकडून उपचार करून तिला पुन्हा वाड्यावर आणण्यात आले. या घटनेप्रकरणी आण्णा मोटे यांनी गणेश झांबरे यांच्याविरुद्ध फुरसुंगी पोलीस ठाण्यात कायदेशीर तक्रार दिली असून, मेंढ्यांवर दगडफेक करून त्यांना जखमी केल्याच्या आरोपामुळे परिसरात चर्चेला उधाण आले आहे.
