छत्रपती संभाजीनगर : नात्यातील किरकोळ वादातून एका तरुणाने आपल्यासोबत लिव्ह-इन रिलेशनशिपमध्ये राहणाऱ्या प्रेयसीवर ब्लेडने जीवघेणा हल्ला केल्याची धक्कादायक घटना छत्रपती संभाजीनगर शहरात उघडकीस आली आहे. कंपनीतून पायी घरी आल्याच्या कारणावरून संतापलेल्या पतीने अथवा पार्टनरने हे कृत्य केले. या घटनेत 28 वर्षीय तरुणी गंभीर जखमी झाली असून तिच्यावर रुग्णालयात उपचार सुरू आहेत.
मिळालेल्या माहितीनुसार, वडगाव कोल्हाटी परिसरातील एका कंपनीत काम करणारी 28 वर्षांची पीडित तरुणी आणि साहेबराव देविदास गजभारे हे गेल्या 5 वर्षांपासून एकत्र (लिव्ह-इन रिलेशनशिप) राहत आहेत. दररोज काम संपल्यानंतर साहेबराव तिला कंपनीतून नेण्यासाठी येत असे. परंतु, 2 ऑक्टोबरच्या रात्री साधारण 8:30 वाजता काम संपल्यानंतर तरुणीने त्याची बराच वेळ वाट पाहिली. साहेबराव वेळेवर न पोहोचल्याने ती शेवटी चालतच घराकडे निघाली.
तरुणी पायी चालत घरी पोहोचताच आरोपी साहेबराव याने तिच्यावर राग काढण्यास सुरुवात केली. “मी येईपर्यंत तू तिथेच का थांबली नाहीस? पायी घरी का आलीस?” असा जाब विचारत त्याने तिला अश्लील शिवीगाळ केली. वाद वाढल्याने त्याने प्रथम तिला बेदम मारहाण केली आणि नंतर खिशातून ब्लेड काढून तिच्या गालावर वार केले.
या अचानक झालेल्या हल्ल्यात तरुणी रक्ताच्या थारोळ्यात पडली. जखमी अवस्थेत तिला तात्काळ उपचारासाठी जवळच्या रुग्णालयात दाखल करण्यात आले. याप्रकरणी पीडित तरुणीच्या तक्रारीवरून वाळूज MIDC पोलीस ठाण्यात साहेबराव गजभारे याच्याविरोधात गुन्हा नोंदवण्यात आला आहे. या दुर्दैवी घटनेमुळे परिसरात मोठी खळबळ उडाली असून पोलीस पुढील तपास करत आहेत
