पुणे: लोहगड किल्ल्यावरील केतन अग्रवाल हत्याप्रकरणात रोज नवे खुलासे समोर येत असताना आता मुख्य आरोपी सिया गोयलच्या आईने चेतन चौधरीबाबत महत्त्वाचा दावा केला आहे. सिया आणि चेतन यांच्या राजस्थान दौऱ्याचे फोटो सोशल मीडियावर व्हायरल होत असताना, चेतन हा सियाचा केवळ मित्र होता आणि त्याच्याबद्दलची माहिती सियाने आधीच केतन अग्रवालला दिली होती, असे सियाच्या आईने सांगितले आहे.
माध्यमांशी बोलताना सियाच्या आईने सांगितले की, सिया उदयपूरला तिच्या एका मैत्रिणीच्या लग्नासाठी गेली होती. त्याच ठिकाणी तिची चेतनशी भेट झाली होती. सिया आणि चेतन एकत्र उदयपूरला गेले नव्हते, असा दावा त्यांनी केला.
तसेच चेतनबाबत कोणतीही गोष्ट सियाने केतनपासून लपवली नव्हती, असेही त्यांनी स्पष्ट केले. “सियाने स्वतः केतनला चेतन नावाचा माझा एक मित्र आहे, असे सांगितले होते. त्यामुळे चेतनबाबत केतनला आधीपासूनच माहिती होती,” असे त्या म्हणाल्या.
सियाच्या आईच्या म्हणण्यानुसार, मार्केट यार्डमधील क्रिकेट सामना आणि त्यानंतर राजस्थान दौऱ्यादरम्यान सिया आणि चेतन हे केवळ मित्र म्हणूनच एकत्र होते. त्यांच्यामध्ये प्रेमसंबंध असल्याची कोणतीही शंका त्यांना किंवा कुटुंबीयांना कधीच आली नव्हती, असेही त्यांनी सांगितले.
दरम्यान, सिया आणि चेतन यांचे राजस्थानमधील फोटो आणि व्हिडिओ व्हायरल झाल्यानंतर या दौऱ्याबाबत विविध चर्चा सुरू आहेत. मात्र, याप्रकरणी सियाच्या आईने आपली बाजू मांडत चेतन हा फक्त मित्र असल्याचा दावा केला आहे. या प्रकरणाचा पुढील तपास पुणे ग्रामीण पोलीस करत आहेत.
