पुणे: पुण्यातील कात्रज परिसरात बेकायदेशीरपणे वास्तव्य करणाऱ्या तीन बांगलादेशी नागरिकांना आंबेगाव पोलिसांनी ताब्यात घेतले आहे. हे तिघे कात्रजमधील शनिनगर येथे राहत होते. हलाल अश्रफ खान (वय ३३ वर्ष), सोहेल खोका शेख (वय ३२ वर्ष) आणि लामिया अल्ताफ हवालदार (वय ३२ वर्ष, तिघे मूळ रा. बांगलादेश) अशी अटक करण्यात आलेल्यांची नावे आहेत. त्यांच्याविरुद्ध परकीय नागरिक कायदा, पारपत्र अधिनियम आणि परकीय नागरिक आदेश कलमान्वये आंबेगाव पोलिस ठाण्यात गुन्हा दाखल करण्यात आला आहे. याबाबत पोलीस उपनिरीक्षक रतिकांत चंद्रशा कोळी यांनी आंबेगाव पोलीस ठाण्यात तक्रार दिली आहे.

अधिक माहिती अशी की, हलाल खान, सोहेल शेख, लामिया हवालदार हे बंगलादेशी नागरिक मागील १५ दिवसांपासून कात्रजमधील शनिनगर येथील जय शिव मल्हार सोसायटीतील एका घरामध्ये वास्तेतव्य करीत होते. याबाबतची माहिती आंबेगाव पोलिसांना मिळाली असता त्यानंतर परिमंडळ दोनच्या पोलीस उपायुक्त स्मार्तना पाटील, सहायक आयुक्त राहुल आवारे यांच्या मार्गदर्शनाखाली आंबेगाव पोलीस ठाण्याचे वरिष्ठ पोलीस निरीक्षक शरद झिने आणि पथकाने कारवाई करुन तिघांना अटक केली.
त्यांना अटक करून त्यांच्याकडून मोबाइल आणि बांगलादेशी नागरिकत्वाचे ओळखपत्र जप्त केले आहे. चौकशीत त्यांनी त्यांच्याकडे असलेल्या मोबाईलवरून बांगलादेशात संपर्क साधल्याची कबुली दिली. त्यांची झडती घेतली असता त्यांच्याकडे कोणतेही भारतीय ओळखपत्र मिळून आले नाही.

मिळालेल्या माहितनुसार, हलाल खान हा मिळेल तेथे मोल मजुरी करतो़. त्याला २०२० मध्येच त्याला नवी मुंबईतील बेलापूर पोलिसांनी बांगला देशी असल्यावरुन ताब्यात घेतले होते. त्यानंतर न्यायालयाकडून त्याला जमीन मिळाल्याचे त्याने सांगितले. सहायक पोलीस फौजदार भोजलिंग धोडमिसे तपास करीत आहेत.







