पुणे: पुण्यातील भवानी पेठेतील काशिवाडी (Pune Crime) परिसरात कौटुंबिक वादातून घडलेल्या एका हत्येच्या घटनेने परिसरात मोठी खळबळ उडाली आहे. एका 40 वर्षीय महिलेनं आपल्या 70 वर्षीय वडिलांची धारदार चाकूनं हत्या केल्याचा प्रकार समोर आला आहे. या प्रकरणी खडक पोलिसांनी आरोपी महिलेला अटक केली असून पुढील तपास सुरू आहे. (Latest Marathi News)
मृत व्यक्तीचं नाव जैनुद्दीन दस्तगीर फुलारी असं आहे. तर आरोपी महिला दिलशाद फुलारी असल्याची माहिती पोलिसांनी दिली आहे. प्राथमिक तपासात समोर आलेल्या माहितीनुसार, जैनुद्दीन फुलारी यांना दारूचं व्यसन होतं. ते अनेकदा दारू पिऊन घरी येत असत आणि घरातील सदस्यांशी वाद घालत असत. यामुळे घरात वारंवार तणावाचं वातावरण निर्माण होत असल्याचं सांगितलं जात आहे.
रविवारी रात्री सुमारे 11 वाजण्याच्या सुमारास जैनुद्दीन फुलारी हे दारूच्या नशेत घरी आले. त्यानंतर घरात पुन्हा वाद सुरू झाला. त्यांनी मुलगी दिलशाद हिला शिवीगाळ केल्याने दोघांमध्ये जोरदार भांडण झालं. हा वाद इतका वाढला की रागाच्या भरात दिलशाद हिनं घरात असलेला धारदार चाकू उचलला आणि वडिलांच्या छातीवर वार केला.
या हल्ल्यात जैनुद्दीन फुलारी गंभीर जखमी झाले. मोठ्या प्रमाणात रक्तस्त्राव झाल्याने ते जागीच कोसळले. त्यांना तातडीने मदत करण्याचा प्रयत्न करण्यात आला, मात्र त्यांचा मृत्यू झाला.
घटनेची माहिती मिळताच खडक पोलिसांचे अधिकारी आणि कर्मचारी तातडीने घटनास्थळी पोहोचले. पोलिसांनी मृतदेह ताब्यात घेऊन शवविच्छेदनासाठी पाठवला. तसेच आरोपी दिलशाद फुलारी हिला ताब्यात घेऊन अटक करण्यात आली आहे. तिच्याविरोधात गुन्हा दाखल करण्यात आला असून या प्रकरणाचा अधिक तपास खडक पोलीस करत आहेत. या घटनेमुळे परिसरात भीती आणि चर्चा सुरू झाली आहे.
