खराडी, ता. 4 : खराडी येथील राजाराम पाटील नगर परिसरातून तब्बल 10 लाख रुपये किमतीची हुंडाई व्हेन्यू कार अज्ञात चोरट्याने चोरून नेल्याची घटना उघडकीस आली आहे. रात्री पार्क करून लॉक केलेली कार दुसऱ्या दिवशी सकाळी गायब झाल्याने परिसरात खळबळ उडाली आहे. याप्रकरणी अक्षय कृष्णा डहाळे (वय 30 , रा. विश्वसाई पीजी, लेन क्रमांक 6 , राजाराम पाटील नगर, खराडी) यांनी खराडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, डहाळे हे खराडी येथील वर्ल्ड ट्रेड सेंटरमधील एका खासगी कंपनीत इंटिग्रेशन डेव्हलपर म्हणून नोकरी करतात. 2 नोव्हेंबर रोजी रात्री सुमारे 11.45 वाजता ते पुणे कॅम्प येथील बर्गर किंगमधून जेवण करून आपल्या हुंडाई व्हेन्यू कारने खराडीतील निवासस्थानी आले. त्यांनी कार राजाराम पाटील नगर येथील विश्वसाई पीजीच्या लेन क्रमांक 6 मधील कोपऱ्यावर पार्क करून लॉक केली आणि आपल्या खोलीत झोपण्यासाठी गेले.
दुसऱ्या दिवशी 3 नोव्हेंबर रोजी सकाळी 10.45 वाजता कामावर जाण्यासाठी ते कारजवळ आले असता, पार्क केलेल्या ठिकाणी कार आढळून आली नाही. त्यांनी परिसरात शोधाशोध करून चौकशी केली; मात्र कारचा काहीही ठावठिकाणा लागला नाही. अखेर अज्ञात चोरट्याने कार चोरून नेल्याचे लक्षात आल्यानंतर त्यांनी पोलिसांत धाव घेतली.
चोरीस गेलेल्या कारची किंमत सुमारे 10 लाख रुपये असून, तिचा क्रमांक एमएच 15 जेएस 2050 असा आहे. कारच्या पुढील काचेवर ‘श्री स्वामी समर्थ’ आणि मागील काचेवर ‘Hridit’ असे लिहिलेले आहे. याप्रकरणी खराडी पोलिसांनी अज्ञात चोरट्याविरोधात गुन्हा दाखल केला असून, पुढील तपास सुरू आहे.
