पुणे: पुणे–मुंबई एक्सप्रेस हायवेवर मावळ तालुक्यात भीषण अपघाताची घटना घडली असून या दुर्घटनेत 2 जणांचा मृत्यू झाला तर 1 जण गंभीर जखमी झाला आहे. या अपघातामुळे काही काळ महामार्गावर खळबळ उडाली असून पोलिसांनी आणि बचाव पथकांनी तातडीने मदतकार्य सुरू केले.
मिळालेल्या प्राथमिक माहितीनुसार, मुंबईकडून पुण्याकडे येणाऱ्या लेनवर बऊर गावाजवळ भरधाव वेगात असलेल्या स्कोडा कारवरील चालकाचे नियंत्रण सुटले. त्यानंतर कार थेट महामार्गावरील लोखंडी सुरक्षा रेलिंगवर जोरात आदळली. धडक इतकी भीषण होती की कारचा समोरील भाग पूर्णपणे चक्काचूर झाला.
या अपघातावेळी कारमध्ये 3 जण प्रवास करत होते. त्यापैकी 2 जणांचा जागीच मृत्यू झाल्याची माहिती समोर आली आहे. तर 1 जण गंभीर जखमी झाला असून त्याच्यावर उपचार सुरू आहेत.
अपघातानंतर कारचा मोठा भाग चेंगरल्याने तिघेही वाहनात अडकून पडले होते. बचाव पथकाने गाडीचा पत्रा कापून त्यांना बाहेर काढले. जखमी व्यक्तीला तातडीने रुग्णालयात दाखल करण्यात आले आहे. तर मृतदेह शवविच्छेदनासाठी शासकीय रुग्णालयात पाठवण्यात आले आहेत.
घटनास्थळी आयआरबी यंत्रणा आणि महामार्ग पोलिसांनी तातडीने धाव घेतली. अपघातग्रस्त वाहन महामार्गावरून हटवून वाहतूक सुरळीत करण्याचे काम सुरू आहे.
प्राथमिक तपासानुसार, अति वेगामुळे चालकाचे वाहनावरील नियंत्रण सुटल्याने हा अपघात झाल्याचा अंदाज व्यक्त केला जात आहे. या घटनेचा पुढील तपास महामार्ग पोलीस करत आहेत.
