पिंपरी-चिंचवड: पुणे आणि पिंपरी-चिंचवड परिसरात कायदा व सुव्यवस्थेचा प्रश्न ऐरणीवर आला आहे. दरम्यान, आता थेट पिंपरी-चिंचवडचे नवनियुक्त महापौर रवी लांडगे यांना जीवे मारण्याची धमकी देण्यात आल्याचा धक्कादायक प्रकार समोर आला आहे. विशेष म्हणजे, आरोपीने थेट पोलीस आयुक्तालयाच्या ‘समाधान हेल्पलाइन’वर फोन करून ही धमकी दिल्यामुळे संपूर्ण राजकीय वर्तुळात आणि पोलीस प्रशासनात मोठी खळबळ उडाली आहे.
आशिष जमदाडे-पाटील असे धमकी देणाऱ्या संशयित आरोपीचे नाव आहे. त्याने थेट पोलिसांच्या अधिकृत हेल्पलाइनवर संपर्क साधून, “मी रवी लांडगे यांना मारून टाकणार आहे,” अशी उघड धमकी दिली. महापौरांना अशा प्रकारे थेट धमकी दिल्याचे समजताच भोसरी पोलिसांनी तात्काळ तपासाची चक्रे फिरवून आरोपी आशिष जमदाडेला ताब्यात घेतले.
आरोपीने क्रीडा क्षेत्राशी संबंधित काही कामासाठी यापूर्वी दोन वेळा महापौरांची प्रत्यक्ष भेट घेतली होती. आरोपीला ताब्यात घेतल्यानंतर त्याची कसून चौकशी करण्यात आली. पोलिसांच्या तपासानुसार, आशिष जमदाडे हा सध्या तीव्र मानसिक तणावाखाली असल्याचे समोर आले आहे.
