पुणे : पिंपरी-चिंचवड शहरातील मोरवाडी भागात एकाच कुटुंबातील 3 सदस्यांनी सामूहिक आत्महत्येचा प्रयत्न केला असल्याची घटना उघडकीस आली होती . या दुर्दैवी घटनेत कुटुंबप्रमुखाचा मृत्यू झाला आहे, तर त्यांची पत्नी आणि तरुण मुलगी यांची प्रकृती सध्या अत्यंत चिंताजनक आहे.आर्थिक समस्यांना कंटाळुन त्यांनी आत्महत्या करण्याचा प्रयत्न केल्याची माहिती समोर आली आहे.
मिळालेल्या प्राथमिक माहितीनुसार, हे कुटुंब मूळचे केरळ राज्यातील असून ते मोरवाडी येथील ‘करिष्मा ग्लोरी सोसायटी’ मधील A/5 विंग, रूम नंबर 201 मध्ये भाड्याने राहत होते. विनोद पिल्लाई (वय 50), त्यांची पत्नी शैलेजा पिल्लाई (वय 45) आणि मुलगी पूर्णिमा पिल्लाई (वय 19) यांनी बंद खोलीत कोळशाचा धूर केला आणि त्यासोबतच काही विषारी औषध प्राशन केले.
घटनेची माहिती मिळताच स्थानिकांच्या मदतीने त्यांना तातडीने पिंपरी येथील वायसीएम रुग्णालयात उपचारासाठी हलवण्यात आले. मात्र, रुग्णालयात पोहोचण्यापूर्वीच विनोद पिल्लाई यांची प्राणज्योत मालवली होती; डॉक्टरांनी तपासणीअंती त्यांना मृत घोषित केले. सध्या त्यांच्या पत्नी शैलेजा आणि मुलगी पूर्णिमा यांच्यावर रुग्णालयात वैद्यकीय उपचार सुरू असून दोघांचीही प्रकृती गंभीर आहे.
घटनास्थळाची पाहणी करताना पोलिसांना एक सुसाइड नोट सापडली आहे. सततच्या आर्थिक अडचणी आणि वाढत्या चणचणीमुळेच हे टोकाचे पाऊल उचलत असल्याचे या चिठ्ठीत नमूद करण्यात आले आहे.
संत तुकाराम नगर पोलीस ठाण्याच्या पथकाने या प्रकरणाची नोंद घेतली असून, केरळमधील त्यांच्या नातेवाईकांना या दुर्देवी घटनेबाबत सूचित करण्यात आले आहे. आर्थिक विवंचनेचे नेमके स्वरूप काय होते, याचा अधिक सखोल तपास पोलीस सध्या करत आहेत.
