पुणे: मुंबईत सायबर फसवणुकीच्या पैशांचा वापर करून पुण्यात ४८ लाख रुपयांचा फ्लॅट खरेदी केल्याचा धक्कादायक प्रकार समोर आला आहे. विशेष म्हणजे, या प्रकरणातील आरोपी एक २५ वर्षीय डिलिव्हरी बॉय आहे. खार पोलिसांनी सायबर फसवणुकीच्या पैशांच्या तपासादरम्यान या प्रकरणाचा छडा लावला असून, आरोपीला अटक केली आहे.
अविनाश खरात (वय २५) असे अटक करण्यात आलेल्या आरोपीचे नाव आहे. त्याचा साथीदार विकास भुजबळ हा सध्या फरार आहे. पोलिसांच्या तपासानुसार, दोघांनी स्वतःच्या तसेच इतर व्यक्तींच्या नावाने तब्बल २२ बँक खाती उघडली होती. या खात्यांमध्ये सायबर फसवणुकीतून मिळालेले तब्बल ७ कोटी ४२ लाख रुपये जमा झाल्याचे समोर आले आहे.
याच पैशांपैकी काही रक्कम वापरून अविनाशने पुणे परिसरात ४८ लाख रुपयांचा फ्लॅट खरेदी केल्याचे तपासात निष्पन्न झाले आहे. त्यामुळे डिलिव्हरी बॉय म्हणून काम करणारा तरुण सायबर फसवणुकीच्या मोठ्या नेटवर्कशी जोडलेला असल्याचे स्पष्ट झाले आहे.
पोलिसांच्या प्राथमिक तपासानुसार, या रॅकेटचे धागेदोरे राजस्थानमधील एका मोठ्या सायबर टोळीशी जोडलेले असल्याचा संशय आहे. टेलिग्रामच्या माध्यमातून वर्क फ्रॉम होम आणि पार्ट टाइम टास्कचे आमिष दाखवून नागरिकांची फसवणूक केली जात होती. या फसवणुकीतून मिळणारी रक्कम वळती करण्यासाठी आरोपींकडून बँक खाती उपलब्ध करून दिली जात असल्याचे पोलिसांच्या तपासात समोर आले आहे.
या रॅकेटचा तपास ४.०७ लाख रुपयांच्या ऑनलाइन टास्क फ्रॉडच्या तक्रारीनंतर सुरू झाला. पीडित व्यक्तीला टेलिग्रामवर टास्क पूर्ण करण्याचे आमिष दाखवून आर्थिक फसवणूक करण्यात आली होती. तक्रारीनंतर खार पोलिसांनी सायबर हेल्पलाइन १९३० आणि तांत्रिक तपासाच्या माध्यमातून आरोपींपर्यंत पोहोचले.
तपासात अविनाशच्या नावावर १३, तर विकास भुजबळच्या नावावर नऊ बँक खाती असल्याचे आढळून आले. विकास सध्या फरार असून त्याचा शोध सुरू आहे. या संपूर्ण नेटवर्कचा पर्दाफाश करण्यासाठी खार पोलिसांचे विशेष पथक तपास करत असून, राजस्थानमधील सायबर टोळीशी संबंधित आणखी आरोपी आणि आर्थिक व्यवहार समोर येण्याची शक्यता आहे.
