पुणे: राज्यात मान्सून सक्रिय झाल्यानंतर पावसाचा जोर कायम असून 28 जून रोजीही हवामान विभागाने महाराष्ट्रातील 27 जिल्ह्यांसाठी यलो अलर्ट जारी केला आहे. अनेक ठिकाणी विजांच्या कडकडाटासह, वादळी वाऱ्यांसह आणि काही भागांत मुसळधार पावसाची शक्यता व्यक्त करण्यात आली आहे. त्यामुळे नागरिकांनी आवश्यक ती खबरदारी घेण्याचे आवाहन करण्यात आले आहे.
कोकण विभागातील पालघर, ठाणे, मुंबई, रायगड, रत्नागिरी आणि सिंधुदुर्ग जिल्ह्यांत हलक्या ते मध्यम स्वरूपाच्या पावसासह काही ठिकाणी जोरदार सरी कोसळण्याचा अंदाज आहे. विशेषतः रायगड आणि रत्नागिरीमध्ये मुसळधार पावसाची शक्यता असून 30 ते 40 किलोमीटर प्रतितास वेगाने वारे वाहू शकतात.
पश्चिम महाराष्ट्रातील पुणे, सातारा, कोल्हापूर, सांगली आणि सोलापूर जिल्ह्यांनाही यलो अलर्ट देण्यात आला आहे. पुणे आणि घाटमाथा परिसरात विजांच्या कडकडाटासह मध्यम ते जोरदार पाऊस पडण्याची शक्यता असून काही ठिकाणी 40 ते 50 किलोमीटर प्रतितास वेगाने वारे वाहण्याचा अंदाज आहे.
मराठवाड्यातील छत्रपती संभाजीनगर, जालना, परभणी, बीड, नांदेड, लातूर, धाराशिव आणि हिंगोली जिल्ह्यांमध्येही वादळी वाऱ्यांसह पावसाचा अंदाज व्यक्त करण्यात आला आहे. उत्तर महाराष्ट्रातील धुळे, नंदुरबार, जळगाव, नाशिक आणि अहिल्यानगर जिल्ह्यांनाही यलो अलर्ट लागू करण्यात आला आहे.
विदर्भातील अकोला, अमरावती, बुलढाणा, भंडारा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ जिल्ह्यांमध्येही काही ठिकाणी मुसळधार पावसाची शक्यता आहे. या भागात विजांच्या कडकडाटासह जोरदार वारे वाहण्याचा अंदाज हवामान विभागाने वर्तवला आहे.
हवामान विभागाने पुढील काही दिवस राज्यात पावसाचा जोर कायम राहण्याची शक्यता व्यक्त केली आहे. त्यामुळे नागरिकांनी आणि शेतकऱ्यांनी हवामानाचा अंदाज लक्षात घेऊन आवश्यक ती खबरदारी घ्यावी, असे आवाहन करण्यात आले आहे.
