पुणे : केतन अग्रवाल यांच्या मृत्यू प्रकरणात पोलिसांनी दाखल केलेल्या आरोपपत्रातून तपासातील नवी माहिती समोर आली आहे. केतनला लोहगडावरून दरीत ढकलल्याची घटना पाहिल्याचा दावा करणाऱ्या तीन प्रत्यक्षदर्शी साक्षीदारांचा उल्लेख आरोपपत्रात करण्यात आला आहे. या साक्षीदारांनी सिया गोयल आणि चेतन चौधरी यांना लोहगडावर पाहिल्याचे तसेच केतनला दरीत ढकलल्याचे पाहिल्याचे पोलिसांच्या तपासात नमूद करण्यात आल्याची माहिती आहे.
या प्रकरणी पुणे ग्रामीण पोलिसांनी पाच हजारांहून अधिक पानांचे आरोपपत्र दाखल केले आहे. त्यामध्ये तपासादरम्यान नोंदविण्यात आलेले साक्षीदारांचे जबाब तसेच विविध डिजिटल आणि तांत्रिक पुराव्यांचा समावेश आहे. केतनच्या मृत्यूची घटना सुरुवातीला अपघात असल्याचे मानले जात होते. मात्र, तपास पुढे गेल्यानंतर त्याचा मृत्यू अपघात नसून त्याला दरीत ढकलण्यात आल्याचा पोलिसांचा दावा आहे.
पोलिसांच्या आरोपपत्रानुसार, केतनची नियोजित वधू सिया गोयल आणि चेतन चौधरी यांच्यावर या प्रकरणात गंभीर आरोप करण्यात आले आहेत. केतनला लोहगडावर नेण्यासाठी बनावट समाजमाध्यम खात्याचा वापर केल्याचेही तपासात समोर आले आहे. या खात्याच्या माध्यमातून केतनशी संपर्क साधण्यात आल्याचा दावा पोलिसांनी केला आहे.
दरम्यान, आरोपपत्रातून राजस्थानमधील घाटूश्याम मंदिरातील एका छायाचित्राची माहितीही समोर आली आहे. या छायाचित्राच्या आधारे सिया आणि चेतन यांच्या विवाहाबाबत पोलिसांनी तपास केला असल्याचे सांगितले जात आहे. मात्र, या छायाचित्रावरून विवाह झाल्याचे निश्चितपणे सिद्ध झालेले नाही.
या प्रकरणात सिया गोयल, चेतन चौधरी आणि रितेश हंगे यांना अटक करण्यात आली आहे. पोलिसांच्या आरोपपत्रातील साक्षीदार आणि इतर पुराव्यांची न्यायालयात तपासणी होणार आहे. त्यामुळे या प्रकरणातील आरोप न्यायालयात सिद्ध होणे अद्याप बाकी आहे.
