पुणे : अवघ्या ३०० चौरस फुटांच्या जागेतून सुरू झालेल्या पुण्यातील मायक्रोटेक पॉलिमर्स या उद्योगाने राष्ट्रीय स्तरावर उल्लेखनीय यश मिळवले आहे. रूपेश शिवरकर आणि गणेश जाधव यांच्या संयुक्त भागीदारीतून उभ्या राहिलेल्या या कंपनीला भारतीय युवा शक्ती ट्रस्ट (BYST) तर्फे दिला जाणारा प्रतिष्ठेचा ‘JRD टाटा पुरस्कार २०२६’ प्रदान करण्यात आला. ‘फास्टेस्ट ग्रोइंग आंत्रप्रेन्योर ऑफ द इयर’ या श्रेणीतील हा पुरस्कार केंद्रीय रस्ते वाहतूक व महामार्ग मंत्री नितीन गडकरी यांच्या हस्ते नवी दिल्ली येथे प्रदान करण्यात आला.

नवी दिल्लीतील हॉटेल शांग्री-ला इरोस येथे हा पुरस्कार सोहळा पार पडला. २०१९ मध्ये रूपेश शिवरकर आणि गणेश जाधव यांनी अवघ्या ३०० चौरस फुटांच्या जागेतून मायक्रोटेक पॉलिमर्सची सुरुवात केली होती. मर्यादित साधनसामग्री, जिद्द, मेहनत आणि दूरदृष्टीच्या जोरावर त्यांनी अल्पावधीत उद्योगाचा विस्तार केला.
मायक्रोटेक पॉलिमर्सकडून पफ आणि सँडविच पॅनेल उद्योग, प्लॅन्ट टिश्यू कल्चर लॅब तसेच गारमेंट उद्योगासाठी विविध प्लास्टिक उत्पादनांची निर्मिती केली जाते. सध्या देशातील २१ राज्यांमध्ये आणि आंतरराष्ट्रीय स्तरावर १० देशांमध्ये कंपनीचे १५० हून अधिक ग्राहक आहेत. निर्यात व्यवसायातही कंपनीने स्वतःची वेगळी ओळख निर्माण केली आहे.

या सोहळ्याला प्रमुख पाहुणे म्हणून केंद्रीय मंत्री नितीन गडकरी उपस्थित होते. पंतप्रधानांच्या आर्थिक सल्लागार परिषदेचे अध्यक्ष प्रा. एस. महेंद्र देव आणि राज्यसभा खासदार विजय चिंताकायला हे सन्माननीय अतिथी म्हणून उपस्थित होते. BYST च्या संस्थापक व व्यवस्थापकीय विश्वस्त लक्ष्मी वेंकटरमण वेंकटेशन यांच्यासह उद्योग, सामाजिक आणि आर्थिक क्षेत्रातील अनेक मान्यवरांनीही कार्यक्रमाला उपस्थिती लावली.
या उद्योजकीय प्रवासात BYST चे मेंटर सौमित्र घोटीकर यांचे मार्गदर्शन महत्त्वाचे ठरले. व्यवसायवृद्धी, नियोजन, योग्य दिशा आणि व्यावसायिक आव्हानांवर मात करण्यासाठी त्यांनी वेळोवेळी केलेल्या मार्गदर्शनाचा मोठा फायदा झाल्याचे दोन्ही भागीदारांनी सांगितले.
या प्रवासात दोन्ही भागीदारांच्या कुटुंबीयांनी दिलेली साथ आणि प्रोत्साहनही मोलाचे ठरले. कठीण प्रसंगांत मिळालेला आधार आणि विश्वास यामुळे उद्योगाची वाटचाल अधिक बळकट झाली. त्यामुळे हा पुरस्कार केवळ व्यावसायिक यशाचा नसून दोन्ही कुटुंबांच्या त्यागाचा आणि सहकार्याचाही सन्मान असल्याची भावना त्यांनी व्यक्त केली.
हा पुरस्कार संयुक्त मेहनत, BYST च्या मार्गदर्शकांचे मार्गदर्शन, संपूर्ण टीमचे योगदान, ग्राहकांचा विश्वास आणि हितचिंतकांच्या सहकार्याचा गौरव असल्याचे रूपेश शिवरकर आणि गणेश जाधव यांनी सांगितले. भविष्यात जागतिक बाजारपेठेत भारतीय उत्पादनांची ओळख अधिक मजबूत करण्यासह उद्योगाचा विस्तार करण्याचा निर्धारही त्यांनी व्यक्त केला.







