पुणे : दारूच्या नशेत गोंधळ घालणाऱ्या दोघांनी गस्त घालणाऱ्या पोलिसांशी अरेरावी करत धक्काबुक्की केल्याची घटना खराडी परिसरात घडली आहे. पोलिसांनी समजावून सांगितल्यानंतरही उद्धट वर्तन करत पोलीस कर्मचाऱ्याशी झटापट केल्याचा आरोप आहे. याप्रकरणी खराडी पोलिसांनी दोघांविरुद्ध शासकीय कामात अडथळा आणल्याचा गुन्हा दाखल केला आहे. ही घटना १२ नोव्हेंबर रोजी मध्यरात्री एकच्या सुमारास टेक्सास टॉवरसमोर घडली.
याप्रकरणी पोलीस अंमलदार अशोक केदार यांनी खराडी पोलीस ठाण्यात फिर्याद दिली आहे. त्यानुसार अजय जयकुमार सावंत (वय ३५) आणि किसन सूर्यभान झेंडे (वय ३२, दोघे रा. बायफ रस्ता, वाघोली) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, बुधवारी मध्यरात्री खराडी पोलीस ठाण्याचे पथक परिसरात गस्त घालत होते. त्यावेळी टेक्सास टॉवर सोसायटीसमोर सावंत आणि झेंडे हे दारूच्या नशेत गोंधळ घालत असल्याचे पोलिसांच्या निदर्शनास आले.
पोलिसांनी दोघांना समजावून सांगत गोंधळ घालू नका आणि परिसरातून निघून जा, असे सांगितले. मात्र, त्यानंतर दोघांनी पोलीस उपनिरीक्षक म्हेत्रे आणि पोलीस अंमलदार अशोक केदार यांच्याशी अरेरावी करत उद्धट वर्तन केल्याचा आरोप आहे.
यावेळी दोघांनी पोलिसांशी झटापट केली. तसेच अशोक केदार यांना धक्काबुक्की करून त्यांच्या गणवेशाचे बटण तोडले. या प्रकारात ते जखमी झाल्याचे फिर्यादीत नमूद करण्यात आले आहे.
या घटनेनंतर खराडी पोलिसांनी दोघांविरुद्ध शासकीय कामात अडथळा आणल्याप्रकरणी गुन्हा दाखल केला आहे. या प्रकरणाचा पुढील तपास पोलीस उपनिरीक्षक सातपुते करीत आहेत.
