पुणे : वानवडी परिसरात 2023 साली घडलेल्या खून व खूनाचा प्रयत्न या गंभीर गुन्ह्यात गेली दोन वर्षे फरार असलेल्या तिघा गुन्हेगारांना अखेर पुणे पोलिसांच्या गुन्हे शाखा युनिट 5 च्या पथकाने कर्नाटकमधील विजापूर येथून अटक केली आहे. अटक करण्यात आलेल्यांची नावे सिकंदर आयुब शेख ऊर्फ सय्यद (वय 34), जाकीर कादीर सय्यद (वय 42) आणि अमिर अकील सय्यद (वय 23, तिघे रा. सय्यदनगर, हडपसर) अशी आहेत.
टोळक्याने केला होता तरुणाचा खून
सदर प्रकरणात 2023 मध्ये वानवडी परिसरात एका तरुणाचा खून करण्यात आला होता, तसेच त्याच्या साथीदारांवरही प्राणघातक हल्ला करण्यात आला होता. या प्रकरणी वानवडी पोलीस ठाण्यात खून, खूनाचा प्रयत्न, बेकायदा जमाव जमवणे आदी गंभीर कलमांखाली गुन्हा दाखल करण्यात आला होता. गुन्हा दाखल झाल्यानंतर आरोपी पसार झाले होते आणि वेगवेगळ्या ठिकाणी लपून राहत होते.
फिर्यादीस दिल्या जात होत्या जीवे मारण्याच्या धमक्या
फरार असलेल्या या आरोपींनी फिर्यादीला वेळोवेळी प्रत्यक्ष व अप्रत्यक्षरित्या जीवे मारण्याच्या धमक्याही दिल्या होत्या, त्यामुळे पोलिसांपुढे या आरोपींचा शोध लावणे अत्यंत गरजेचे झाले होते.
वरिष्ठ अधिकाऱ्यांच्या सूचनेनुसार गुन्हे शाखेच्या युनिट 5 च्या पथकाने तपास सुरु केला. तपासात आरोपी विजापूर (कर्नाटक) येथे वास्तव्यास असल्याची माहिती मिळाल्यानंतर पोलिसांनी स्थानिक पोलिसांच्या मदतीने विजापूरमध्ये कारवाई करत तिघांना ताब्यात घेतले आणि पुण्यात आणले.
सदर कारवाई अपर पोलीस आयुक्त पंकज देशमुख, पोलीस उपायुक्त निखील पिंगळे आणि सहायक पोलीस आयुक्त राजेंद्र मुळीक यांच्या मार्गदर्शनाखाली वरिष्ठ पोलीस निरीक्षक संजय पतंगे, पोलीस उपनिरीक्षक प्रमोद खरात, पोलीस अंमलदार राजस शेख, प्रशांत कर्णवर आणि नासेर देशमुख यांनी केली.
