पुणे : पुण्यातील डेक्कन परिसरात पहाटेच्या वेळी कॅफेमध्ये झालेल्या हल्ल्याने खळबळ उडाली आहे. सोशल मीडियावरील रिल्सला लाईक आणि कमेंट करण्याच्या कारणावरून झालेल्या वादानंतर एका तरुणावर कोयत्याने हल्ला करण्यात आल्याची घटना समोर आली आहे. या प्रकारामुळे कॅफेमध्ये उपस्थित असलेल्या तरुणांमध्ये भीतीचे वातावरण निर्माण झाले.
मिळालेल्या माहितीनुसार, डेक्कन परिसरातील ‘फ्लाईंग जिप्सी’ कॅफेमध्ये पहाटेपर्यंत पार्टी सुरू होती. यावेळी सोशल मीडियावरील रिल्सवरून काही तरुणांमध्ये वाद झाला. सुरुवातीला झालेला शाब्दिक वाद काही वेळातच हाणामारीपर्यंत पोहोचला.
यानंतर एका टोळक्याने कॅफेमध्ये गोंधळ घालत कोयते बाहेर काढल्याचे सांगण्यात येत आहे. त्यानंतर एका तरुणावर कोयत्याने वार करण्यात आले. अचानक घडलेल्या या प्रकारामुळे कॅफेमधील इतर ग्राहकांमध्ये घबराट पसरली. काही जणांनी सुरक्षित ठिकाणी जाण्यासाठी धावपळ केली.
या घटनेतील आणखी एक धक्कादायक बाब म्हणजे संबंधित टोळक्यात 8 ते 10 जणांचा समावेश असल्याची माहिती आहे. त्यामध्ये 2 मुलीही असल्याचे सांगण्यात येत आहे. त्यामुळे या प्रकरणाची गंभीरता आणखी वाढली आहे. तसेच कॅफेमध्ये कोयत्यासारखी शस्त्रे घेऊन टोळके आत कसे पोहोचले, हा प्रश्नही उपस्थित झाला आहे. घटनेची माहिती मिळताच पोलिसांनी तपास सुरू केला असून हल्लेखोरांची ओळख आणि घटनेमागील नेमके कारण शोधण्याचे काम सुरू आहे.
