पुणे: पुणे जिल्ह्यातील भीमा सहकारी साखर कारखाना संदर्भात मोठी घडामोड समोर आली आहे. कारखान्यावर प्रशासक नियुक्त करण्याच्या आदेशाला सहकार मंत्री बाबासाहेब पाटील यांनी स्थगिती दिली आहे. त्यामुळे सध्याचे संचालक मंडळ जैसे थे राहणार असल्याची माहिती संचालक तुकाराम भिकोबा ताकवणे यांनी दिली.
मिळालेल्या माहितीनुसार, प्रादेशिक संयुक्त संचालक (साखर) नीलिमा गायकवाड यांनी 22 एप्रिल 2026 रोजी कारखान्याबाबत आदेश काढला होता. या आदेशानुसार प्रशासकीय समिती नेमून कारखान्याच्या कामकाजात बदल होणार होते. मात्र हा निर्णय एकतर्फी घेतला गेला असून नियमांचे उल्लंघन झाल्याचा आरोप संचालक तुकाराम ताकवणे यांनी केला.
या आदेशाविरोधात ताकवणे यांनी महाराष्ट्र सहकारी संस्था कायदा 1960 मधील कलम 152 आणि 154 अंतर्गत पुनर्विचार अर्ज दाखल करत थेट मंत्रालयात धाव घेतली. या अर्जात प्रादेशिक संयुक्त संचालक तसेच नियुक्त प्रशासकीय समितीचे अध्यक्ष आणि सदस्य यांना प्रतिवादी करण्यात आले आहे.
दरम्यान, आदेश देताना नैसर्गिक न्यायदानाचे उल्लंघन झाले का, तसेच निर्णयप्रक्रियेत पारदर्शकता होती का, असे प्रश्नही उपस्थित करण्यात आले आहेत. या पार्श्वभूमीवर सहकार मंत्री बाबासाहेब पाटील यांनी तातडीने हस्तक्षेप करत आदेशाला स्थगिती दिली.
या निर्णयामुळे सहकार क्षेत्रात मोठी चर्चा रंगली असून पुढील काळात या प्रकरणाची सखोल चौकशी होण्याची शक्यता व्यक्त केली जात आहे. मंत्रीस्तरावर हस्तक्षेप झाल्याने प्रशासकीय आणि राजकीय वर्तुळातही या प्रकरणाकडे लक्ष लागले आहे.
