पुणे: पुण्यात किरकोळ कारणांवरून होणाऱ्या गुन्ह्यांच्या घटना वाढत असतानाच आणखी एक धक्कादायक प्रकार समोर आला आहे. मोबाईल चोरीचा संशय घेत ४२ वर्षीय व्यक्तीची बेदम मारहाण करून हत्या करण्यात आल्याची घटना मोई गावातील गुरुकृपा हाउसिंग सोसायटी परिसरात घडली आहे. या प्रकरणी पोलिसांनी २८ वर्षीय आरोपीला अटक केली असून, घटनेमुळे परिसरात खळबळ उडाली आहे.
मृत व्यक्तीचे नाव चांद शेख (वय ४२) असे आहे. तर हरालाल सुभाष चंद्र गौतम (वय २८, सध्या रा. निघोजे, ता. खेड, मूळ रा. उत्तर प्रदेश) असे अटक करण्यात आलेल्या आरोपीचे नाव आहे. या प्रकरणी मृताच्या पत्नीने ३ जुलै रोजी संबंधित पोलीस ठाण्यात तक्रार दाखल केली आहे. ही घटना २९ जून रोजी घडल्याचे पोलिसांनी सांगितले.
पोलिसांनी दिलेल्या माहितीनुसार, चांद शेख आणि हरालाल गौतम हे दोघेही मजुरीचे काम करत होते. काही दिवसांपूर्वी हरालाल याचा मोबाईल हरवला होता. तो मोबाईल चांद शेख यांनीच घेतल्याचा संशय आरोपीला होता. याच कारणावरून दोघांमध्ये वारंवार वाद होत होता.
२९ जून रोजी गुरुकृपा हाउसिंग सोसायटी परिसरात दोघांमध्ये पुन्हा वाद झाला. हा वाद वाढत जाऊन हाणामारीत बदलला. संतापाच्या भरात आरोपीने चांद शेख यांच्या चेहऱ्यावर आणि डोक्यावर जोरदार मारहाण केली. गंभीर दुखापत झाल्याने चांद शेख यांचा घटनास्थळीच मृत्यू झाला.
घटना घडल्यानंतर आरोपी तेथून पळून गेला. त्यानंतर मृताच्या पत्नीने पोलिसांकडे तक्रार दाखल केली. पोलिसांनी तांत्रिक तपास आणि इतर माहितीच्या आधारे आरोपीचा शोध घेत निघोजे परिसरातून त्याला अटक केली. सध्या आरोपीची चौकशी सुरू असून, या प्रकरणाचा पुढील तपास पोलीस करत आहेत.
