पुणे : बॉलिवूडचा ‘मिस्टर परफेक्शनिस्ट’ आमिर खान याने तिसऱ्यांदा आपल्या आयुष्याची एक नवीन सुरुवात केली आहे. गेली दोन वर्षे एकमेकांना डेट केल्यानंतर, आमिर खान आणि गौरी स्प्रॅट अखेर विवाहबंधनात अडकले आहेत. मुंबईतील वांद्रे येथील निवासस्थानी अगदी मोजक्या लोकांच्या उपस्थितीत हा खाजगी विवाहसोहळा पार पडला. या खास प्रसंगी आमिर आणि गौरीच्या कुटुंबातील सदस्य, जवळचे मित्र आणि त्यांच्या आधीच्या लग्नांमधील मुले उपस्थित होती.
सध्या सोशल मीडियावर त्यांच्या या लग्नसोहळ्याचा पहिला फोटो प्रचंड व्हायरल होत आहे. ‘spicesocial’ ने शेअर केलेल्या या फोटोमध्ये आमिर खान लग्नाच्या कायदेशीर कागदपत्रांवर स्वाक्षरी करताना दिसत आहे, तर गौरी त्याच्या शेजारी बसली आहे. या दोघांच्या मध्ये गौरीचा मुलगा उभा असून, बाजूला आमिरचा मुलगाही दिसत आहे. संपूर्ण कुटुंब एकत्र खूप आनंदी आणि सुंदर दिसत असून, चाहत्यांकडून या नवविवाहित जोडप्यावर शुभेच्छांचा वर्षाव होत आहे.
आमिर आणि गौरी यांच्यातील नात्याची सुरुवात 2024 मध्ये झाली होती. सुरुवातीला साधारण एक वर्ष ते लाँग-डिस्टन्स रिलेशनशिपमध्ये होते. त्यानंतर मार्च 2025 मध्ये, आपल्या 60 व्या वाढदिवसाचे औचित्य साधून आमिर खानने गौरी हीच त्याची जीवनसाथी असल्याचे जाहीर केले होते.
आमिर खानचे हे तिसरे लग्न आहे. यापूर्वी १९८६ मध्ये त्याने रीना दत्तासोबत पहिले लग्न केले होते, परंतु २००६ मध्ये त्यांचा घटस्फोट झाला. त्यानंतर त्याने चित्रपट निर्माती किरण राव हिच्याशी दुसरे लग्न केले, मात्र २०२१ मध्ये ते दोघेही एकमेकांपासून वेगळे झाले. आता गौरी स्प्रॅटसोबत लग्न करून आमिरने आपल्या आयुष्याचे एक नवीन आणि आनंदी पान सुुरू केले आहे.
