मुंबई : मुंबईत सुरु असलेल्या मुसळधार पाऊस आणि वेगवान वाऱ्यामुळे कुर्ला परिसरात झाड कोसळून एका ज्येष्ठ नागरिकाचा दुर्दैवी मृत्यू झाला आहे. युनुस कुंदावाला (वय 63) असे मृताचे नाव असून, या घटनेमुळे मुंबई महानगरपालिकेच्या कारभारावर आणि मान्सूनपूर्व कामांवर पुन्हा एकदा गंभीर प्रश्न उपस्थित झाले आहेत.
कुर्ला (पश्चिम) येथील कमानी परिसरातील ‘गोम्स गाऊन बिल्डिंग’जवळ रविवारी दुपारी अचानक सोसाट्याचा वारा सुटला. यावेळी तेथील एक मोठे झाड शेजारील दुकानावर उन्मळून पडले. दुर्दैवाने, त्याच दुकानात हजर असलेले युनुस कुंदावाला झाडाच्या ढिगाऱ्याखाली दाबले गेले. स्थानिक रहिवाशांनी त्यांना तातडीने बाहेर काढून जवळच्या ‘फौझिया हॉस्पिटल’मध्ये नेले, मात्र डॉक्टरांनी त्यांना दाखल करण्यापूर्वीच मृत घोषित केले.
या दुर्घटनेनंतर मुंबई अग्निशामक दल, पोलीस, बेस्टचे कर्मचारी आणि पालिकेच्या वॉर्ड ऑफिसचे पथक घटनास्थळी दाखल झाले. वीजवाहिन्या तुटल्यामुळे परिसरातील वीज खंडित झाली होती, जी पूर्ववत करण्याचे काम युद्धपातळीवर सुरू करण्यात आले.
काही दिवसांपूर्वीच चेंबूर येथे स्कूलबसवर झाड पडून एका विद्यार्थ्याचा जीव गेल्याची घटना ताजी असतानाच, कुर्ल्यामध्ये ही दुसरी मोठी दुर्घटना घडली आहे. झाड छाटणीच्या पालिकेच्या दाव्यांची पोलखोल या घटनेमुळे झाली आहे. सर्वात धक्कादायक बाब म्हणजे, एवढी भीषण दुर्घटना होऊन 4 ते 5 तास उलटले, तरी महापालिकेचा एकही जबाबदार अधिकारी घटनास्थळी पोहोचला नाही.
महापालिकेच्या या उदासीन भूमिकेमुळे स्थानिक नागरिक आणि महाराष्ट्र नवनिर्माण सेनेचे (मनसे) कार्यकर्ते प्रचंड आक्रमक झाले. पालिकेच्या निष्काळजीपणामुळे निष्पाप मुंबईकरांना जीव गमवावा लागत असल्याचा आरोप करत मनसैनिकांनी प्रशासनाचा तीव्र निषेध केला आहे .
