पुणे : अंगारक संकष्टी चतुर्थीनिमित्त पुण्यातील श्रीमंत दगडूशेठ हलवाई गणपती मंदिरात भाविकांची मोठी गर्दी होण्याची शक्यता असल्याने पुणे वाहतूक पोलिसांनी शहराच्या मध्यवर्ती भागातील वाहतुकीत बदल केले आहेत. मंगळवारी (२९ सप्टेंबर) सकाळी ६ वाजल्यापासून गर्दी कमी होईपर्यंत हे वाहतूक बदल लागू राहणार आहेत. अत्यावश्यक सेवेतील वाहनांना या निर्बंधांमधून सूट देण्यात आली आहे.
वाहतूक नियोजनानुसार, पूरम चौकातून बाजीराव रस्त्याने शिवाजीनगरच्या दिशेने जाणारी वाहने लोकमान्य टिळक रस्ता, टिळक चौक आणि फर्ग्युसन रस्त्याने वळवण्यात येणार आहेत. तसेच छत्रपती शिवाजी महाराज रस्त्यावरून स्वारगेटकडे जाणाऱ्या वाहनांना स. गो. बर्वे चौक, जंगली महाराज रस्ता, खंडोजीबाबा चौक आणि त्यानंतर टिळक रस्त्याचा वापर करावा लागणार आहे.
अप्पा बळवंत चौकातून बुधवार चौकाकडे जाणारी वाहतूक बंद ठेवण्यात येणार आहे. या मार्गावरील वाहने बाजीराव रस्त्याने पुढे सोडण्यात येतील. स. गो. बर्वे चौकातून महापालिकेच्या दिशेने जाणाऱ्या पीएमपी बस झाशी राणी चौकातून डावीकडे वळवण्यात येणार आहेत.
गणेश रस्त्यावरील वाहतुकीतही बदल करण्यात आला आहे. या मार्गावरील वाहने दारूवाला पुलाच्या दिशेने गाडगीळ पुतळा, कुंभार वेस, पवळे चौक आणि नरपतगिरी चौकमार्गे वळवण्यात येणार आहेत. अंगारक संकष्टी चतुर्थीनिमित्त मंदिर परिसरात मोठी गर्दी होण्याची शक्यता लक्षात घेऊन वाहतूक सुरळीत ठेवण्यासाठी हे नियोजन करण्यात आले आहे. त्यामुळे मध्यवर्ती पुण्यातून प्रवास करणाऱ्या नागरिकांनी वाहतूक बदल लक्षात घेऊन पर्यायी मार्गांचा वापर करावा, असे आवाहन वाहतूक पोलिसांनी केले आहे.
