Andekar Gang: आंदेकर टोळीची आर्थिक कोंडी करण्याच्या उद्देशाने पोलिसांनी मोठी कारवाई करत टोळीशी संबंधित 27 बँक खाती गोठवल्याची माहिती समोर आली आहे. या खात्यांमध्ये एकूण 50,66,199 इतकी रक्कम आढळून आली आहे. या कारवाईत महापालिकेच्या सहकार्याने नागझरी येथील अनधिकृत मासे बाजारावर छापा टाकण्यात आला होता.
पुणे पोलिसांकडून आंदेकर टोळीच्या सदस्यांची स्थावर व जंगम मालमत्तांची माहिती गोळा केली जात आहे. या प्रक्रियेसाठी आवश्यक त्या कारवाया केल्या जात आहेत. टोळीच्या आर्थिक स्रोतांची नाकाबंदी करून या गुन्हेगारी टोळीचे कंबरडे मोडण्याचा हा प्रयत्न केला जात आहे.
माजी नगरसेवक वनराज आंदेकर (Vanraj Andekar) याच्या हत्येचा बदला घेण्यासाठी टोळीने बंडू (Bandu Andekar) आंदेकर याचा नातू आयुष कोमकर याचा गोळ्या घालून खून करण्यात आला होता, या घटनेमुळे पुणे शहर हादरले होते. तसेच टोळीयुद्ध भडकण्याची शक्यता निर्माण झाली होती. ज्यामुळे पुणे शहरात प्रचंड खळबळ उडाली होती.
टोळीप्रमुखाच्या घरातून लाखोंचा ऐवज जप्त
त्यानंतर पोलिसांनी सक्रिय होत अनेक कारवाया करून आरोपींना पकडलं आहे. तसंच आता पोलिसांनी टोळीप्रमुख बंडू आंदेकर आणि त्याच्या नातेवाईकांच्या घरी झडती घेतली आहे. यात सुमारे 67 लाखांचे दागिने, 2.5 लाखांची रोकड, एक आलिशान मोटार, विविध करारनामे आणि कर भरल्याच्या पावत्या पोलिसांनी जप्त केल्या आहेत. या कारवाईत सापडलेल्या कागदपत्रांच्या आधारे त्याच्या बेनामी मालमत्तांची तपासणीही सुरू आहे.
पोलिसांकडून टोळीविरोधातील ही आर्थिक कारवाई अधिक तीव्र करण्याचे संकेत असून, गुन्हेगारीला आर्थिक पाठबळ पुरवणाऱ्या साखळ्या तोडण्यासाठी ठोस पावले उचलली जात आहेत.
