पुणे : न्यायालयाने पकड वॉरंट जारी केलेले असतानाही गेल्या वर्षभरापासून पोलिसांना गुंगारा देणाऱ्या फरार आरोपीला पुणे गुन्हे शाखेच्या युनिट एकच्या पथकाने अखेर अटक केली आहे. साई रामदास पाटोळे (वय २३, रा. अमृता नगर, माणिकबाग, सिंहगड रोड, पुणे) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, ७ नोव्हेंबर रोजी गुन्हे शाखा युनिट एकचे पथक पाहिजे, फरार, तडीपार तसेच मोक्का गुन्ह्यांतील आरोपींचा शोध घेत होते. त्यावेळी पोलीस अंमलदार विनोद चव्हाण यांना गोपनीय बातमीदारामार्फत माहिती मिळाली की, डेक्कन पोलीस ठाण्यातील पकड वॉरंटमधील आरोपी साई पाटोळे हा सिंहगड रोड परिसरातील आपल्या घरी आहे.
या माहितीच्या आधारे पोलिसांनी संबंधित ठिकाणी जाऊन पाहणी केली असता घराला कुलूप असल्याचे दिसून आले. मात्र, परिसरात चौकशी केली असता आरोपी घरातच असल्याची माहिती पोलिसांना मिळाली.
पोलिसांनी दरवाजा वाजवल्यानंतर एक तरुण बाहेर आला. त्याच्याकडे नाव विचारले असता त्याने साई रामदास पाटोळे असे सांगितले. न्यायालयात सुनावणीच्या तारखेला हजर का राहत नाही, अशी विचारणा केली असता त्याने उडवाउडवीची उत्तरे दिली.
अधिक चौकशी केली असता विशेष खटला क्रमांक ७२६/२०२१ मधील पकड वॉरंट त्याच्याविरोधात प्रलंबित असल्याचे आणि तो गेल्या वर्षभरापासून फरार असल्याचे निष्पन्न झाले. त्यानंतर पोलिसांनी त्याला ताब्यात घेतले.
ही कारवाई अपर पोलीस आयुक्त तेजस्वी सातपुते, पोलीस उपायुक्त गौहर हसन आणि सहायक पोलीस आयुक्त शैलेश संखे यांच्या मार्गदर्शनाखाली करण्यात आली. वरिष्ठ पोलीस निरीक्षक दीपक लगड यांच्या नेतृत्वाखाली पोलीस अंमलदार भारत भोसले, विनोद चव्हाण, जगताप आणि नांगरे यांनी या कारवाईत सहभाग घेतला.
