पुणे: पुण्यातील कोरेगाव पार्क परिसरातील एका हायप्रोफाइल पबमध्ये तरुणीचा विनयभंग झाल्याची धक्कादायक घटना समोर आली आहे. या प्रकरणी पोलिसांनी संबंधित आरोपीसोबतच पब व्यवस्थापकाविरुद्धही गुन्हा दाखल केला आहे. आरोपीला पळून जाण्यास मदत केल्याचा आरोप व्यवस्थापकावर करण्यात आला आहे.
मिळालेल्या माहितीनुसार, 24 वर्षीय तरुणी 11 एप्रिल रोजी कोरेगाव पार्क येथील डार्क हॉर्स पब येथे गेली होती. रात्री सुमारे 2 ते 2.15 च्या दरम्यान ती वॉशरूमबाहेर उभी असताना एका अनोळखी व्यक्तीने तिच्याशी गैरवर्तन केले आणि अयोग्य प्रकारे स्पर्श केला. अचानक घडलेल्या या प्रकारामुळे ती घाबरली आणि तिने मोठ्याने आरडाओरडा केला.
तरुणीच्या आरडाओरडामुळे पबमध्ये गोंधळ उडाला. मात्र, या वेळी मदत करण्याऐवजी पबच्या व्यवस्थापकाने आरोपीला तिथून पळून जाण्यास मदत केल्याचा गंभीर आरोप करण्यात आला आहे. या पार्श्वभूमीवर पोलिसांनी विनयभंग करणाऱ्या व्यक्तीसोबतच व्यवस्थापकाविरोधातही गुन्हा दाखल केला आहे.
या घटनेची माहिती मिळताच संगीता अल्फान्सो-शिंदे यांनी तातडीने घटनास्थळी भेट देत पाहणी केली. कोरेगाव पार्क पोलिस सध्या पबमधील सीसीटीव्ही फुटेज तपासत असून आरोपीचा शोध सुरू आहे.
पुण्यातील पब संस्कृतीवर आधीपासूनच चर्चा सुरू असताना या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला आहे. शहरात रात्रीच्या वेळी सुरक्षिततेबाबत अधिक कडक उपाययोजना करण्याची गरज व्यक्त केली जात आहे.
