पुणे : पुण्याकडे प्रवास करणाऱ्या एका व्यापाऱ्याला टायर पंक्चर झाल्याचे सांगून आठ हजार रुपयांना फसवल्याचा धक्कादायक प्रकार खेड शिवापूर परिसरात उघडकीस आला आहे. दुचाकीवरून आलेल्या दोघांनी व्यापाऱ्याच्या कारचे चाक पंक्चर झाल्याचे सांगितले. त्यानंतर पंक्चरच्या दुकानातील आणखी दोघांच्या मदतीने फसवणुकीचा बनाव रचण्यात आला. याप्रकरणी राजगड पोलीस ठाण्यात चार अज्ञात आरोपींविरोधात गुन्हा दाखल करण्यात आला आहे.

सुरत जिल्ह्यातील कामरेज तालुक्यातील वराचा येथील रहिवासी असलेले व्यापारी डेनेश बिखाभाई भंडेरी (वय ३०) हे चारचाकी वाहनाने पुण्याच्या दिशेने प्रवास करत होते. त्यावेळी पाठीमागून दुचाकीवरून आलेल्या दोघांनी त्यांच्या कारचे मागील चाक पंक्चर झाल्याचे सांगितले.
दुचाकीस्वारांच्या बोलण्यावर विश्वास ठेवून भंडेरी यांनी जवळच्या पंक्चरच्या दुकानात कार नेली. तेथे आधीच आणखी दोन अनोळखी व्यक्ती उपस्थित होत्या. त्यांनी कारचे चारही टायर पंक्चर असल्याचे सांगितले. तसेच टायरमध्ये केमिकल टाकावे लागेल आणि त्यासाठी आठ हजार रुपये खर्च येईल, असे सांगून व्यापाऱ्याला विश्वासात घेतले.

आरोपींनी भंडेरी यांच्याकडून फोन-पेद्वारे आठ हजार रुपये घेतले. मात्र, पैसे मिळाल्यानंतर टायरमध्ये केमिकल टाकल्याचा केवळ बनाव केला. व्यापारी कार घेऊन पुढे निघाल्यानंतर आपली फसवणूक झाल्याचे त्यांच्या लक्षात आले.
यानंतर डेनेश भंडेरी यांनी राजगड पोलीस ठाण्यात धाव घेऊन तक्रार दाखल केली. पोलिसांनी चार अज्ञात आरोपींविरोधात गुन्हा नोंदवला असून, या प्रकरणाचा पुढील तपास सुरू आहे.







