वाघोली : सणसवाडी (ता. शिरूर) येथील जमीन खरेदीच्या आमिषाने सहा जणांकडून प्रत्येकी चार लाख रुपये, असे एकूण 24 लाख रुपये घेऊन खरेदीखत करूनही जमिनीचा ताबा न दिल्याचा प्रकार उघडकीस आला आहे. याप्रकरणी वाघोली येथील कार्यालय असलेल्या अॅड. भगवान मारुती कोलते यांच्याविरोधात वाघोली पोलीस ठाण्यात फसवणुकीची तक्रार दाखल करण्यात आली आहे.

पोलिसांनी दिलेल्या माहितीनुसार, फिर्यादी रोजी विरण नेसमणी (वय 50, रा. इंदिरानगर, खडकी बाजार, पुणे) यांना खडकी परिसरात घरकुल बांधण्यासाठी सणसवाडी येथील गट क्रमांक 1124/1 मधील जागेबाबत पत्रकाद्वारे माहिती देण्यात आली होती. त्यानंतर त्यांनी संबंधित कार्यालयात जाऊन जागेची पाहणी केली. त्यावेळी अॅड. भगवान कोलते यांनी गुंठ्याला चार लाख रुपये दर सांगून हप्त्याने पैसे भरण्यास सांगितले.
त्यानुसार फिर्यादी यांनी 18 जानेवारी 2020 रोजी सुरुवातीला 90 हजार रुपये आणि त्यानंतर वेळोवेळी हप्त्यांमध्ये पैसे भरले. अशा प्रकारे त्यांनी एकूण चार लाख रुपये दिले. पैसे भरल्यानंतर 13 जानेवारी 2023 रोजी दुय्यम निबंधक कार्यालय, तळेगाव ढमढेरे येथे दस्त क्रमांक 410/2023 अन्वये फिर्यादीसह अन्य 21 जणांचे खरेदीखत करून देण्यात आले.

मात्र, खरेदीखत होऊनही प्रत्यक्ष जागेचा ताबा मिळत नसल्याने संबंधितांनी वारंवार कोलते यांच्याकडे ताब्याची मागणी केली. प्रत्येक वेळी वेगवेगळी कारणे सांगून वेळ मारून नेण्यात आल्याचा आरोप आहे. मे 2026 मध्ये फिर्यादी यांना एक लाख रुपये परत करण्यात आले. उर्वरित रक्कम आणि जागेचा ताबा मिळवण्यासाठी पाठपुरावा करूनही कोलते भेटणे टाळू लागल्याने आपली फसवणूक झाल्याचे फिर्यादीच्या लक्षात आले.
याच पद्धतीने अन्य पाच जणांकडूनही प्रत्येकी चार लाख रुपये घेऊन खरेदीखत करण्यात आले; मात्र त्यांनाही जमिनीचा ताबा देण्यात आला नसल्याचे तक्रारीत म्हटले आहे. अशा प्रकारे सहा जणांचे एकूण 24 लाख रुपये घेऊन जागेचा ताबा न देता फसवणूक केल्याचा आरोप करण्यात आला आहे. या प्रकरणामुळे जमीन खरेदीसाठी आयुष्यभराची पुंजी गुंतवणाऱ्या नागरिकांमध्ये चिंतेचे वातावरण निर्माण झाले आहे. या तक्रारीच्या अनुषंगाने वाघोली पोलीस पुढील तपास करीत आहेत.






