सासवड : पुरंदर तालुक्यातील पांगरे गावात गुरुवारी सकाळी एका महिलेची धारदार शस्त्राने वार करून हत्या करण्यात आली. उज्वला रामदास काकडे (वय 47) असे मृत महिलेचे नाव आहे. सकाळी कामावर जाण्यासाठी घराबाहेर पडलेल्या उज्वला यांच्यावर रस्त्यातच हल्ला करण्यात आल्याने परिसरात भीतीचे वातावरण निर्माण झाले आहे.

मिळालेल्या प्राथमिक माहितीनुसार, उज्वला काकडे नेहमीप्रमाणे कामावर जाण्यासाठी घरातून निघाल्या होत्या. त्या बसस्थानकाच्या दिशेने जात असताना अज्ञात व्यक्तीने अचानक त्यांच्यावर धारदार शस्त्राने हल्ला केला. हल्लेखोराने त्यांच्या डोक्यावर गंभीर वार केले. या हल्ल्यात त्यांचा जागीच मृत्यू झाल्याची प्राथमिक माहिती समोर आली आहे.
घटनेची माहिती मिळताच पांगरे गावचे पोलीस पाटील तानाजी काकडे यांनी तातडीने सासवड पोलिसांना कळवले. माहिती मिळताच पोलिसांचे पथक घटनास्थळी दाखल झाले. पोलिसांनी घटनास्थळाचा पंचनामा करून मृतदेह उत्तरीय तपासणीसाठी सासवड ग्रामीण रुग्णालयात पाठवला आहे.

भरवस्तीत आणि सकाळच्या वेळी ही घटना घडल्याने नागरिकांमध्ये चिंतेचे वातावरण आहे. उज्वला काकडे यांच्यावर हल्ला करण्यामागचे नेमके कारण अद्याप समजू शकलेले नाही. हा प्रकार वैयक्तिक वादातून घडला की त्यामागे अन्य काही कारण आहे, याचा तपास पोलीस करत आहेत.






