पुणे: पुण्यातील हिंजवडी परिसरात प्रेमसंबंधातून घडलेल्या एका धक्कादायक घटनेने संपूर्ण शहर हादरले आहे. शालेय जीवनापासून सुरू असलेल्या प्रेमसंबंधात तिसऱ्या व्यक्तीची एन्ट्री झाल्याने निर्माण झालेल्या रागातून एका तरुणाने आपल्या एक्स गर्लफ्रेंडसमोर तिच्या सध्याच्या प्रियकराची निर्घृण हत्या केल्याची घटना उघडकीस आली आहे.
मिळालेल्या माहितीनुसार, दिनेश झांबरे हा तरुण आपल्या एक्स गर्लफ्रेंड निकिता राहत असलेल्या हिंजवडीतील एका सात मजली पीजीमध्ये पोहोचला. तेथे गेल्यानंतर त्याने निकिता आणि तिचा सध्याचा प्रियकर सागर गायकवाड यांचा शोध घेतला. परिसरातील सीसीटीव्हीमध्ये तो शांतपणे पीजीमध्ये प्रवेश करताना आणि लिफ्टचा वापर न करता पायऱ्यांनी वरच्या मजल्यावर जाताना दिसत आहे.
वर पोहोचल्यानंतर दिनेशने लोखंडी रॉडने सागर गायकवाडवर सपासप वार केले. अवघ्या काही मिनिटांत त्याने १० ते १५ हल्ले केल्याची प्राथमिक माहिती समोर आली आहे. या भीषण हल्ल्यात सागरचा जागीच मृत्यू झाला, तर निकिताही गंभीर जखमी झाली. तिच्यावर सध्या रुग्णालयात उपचार सुरू आहेत.
View this post on Instagram
प्राथमिक तपासात समोर आलेल्या माहितीनुसार, दिनेश आणि निकिता यांचे शाळेपासून प्रेमसंबंध होते. मात्र, शिक्षणासाठी पुण्यात आल्यानंतर निकिताची ओळख सागर गायकवाड याच्याशी झाली आणि दोघांमध्ये प्रेमसंबंध निर्माण झाले. याच कारणावरून दिनेशच्या मनात संताप निर्माण झाला होता. त्यातूनच त्याने पीजीमध्ये जाऊन हा जीवघेणा हल्ला केल्याचे पोलिसांच्या तपासातून समोर येत आहे.
घटनेची माहिती मिळताच हिंजवडी पोलिसांनी तातडीने घटनास्थळी धाव घेत आरोपी दिनेश झांबरे याला अटक केली. या प्रकरणाचा पुढील तपास सुरू असून, भरदिवसा घडलेल्या या घटनेमुळे हिंजवडी आयटी पार्क परिसरात भीती आणि खळबळ पसरली आहे.
