पुणे : कुटुंबावरील कर्जाचा डोंगर, पतीचे दिव्यांगत्व आणि कुटुंबाची जबाबदारी यामुळे एका महिलेने परदेशात नोकरी करण्याचा निर्णय घेतला. याचाच फायदा घेत एका एजंटने तिला दुबईतील हॉटेलमध्ये नोकरी मिळवून देण्याचे आमिष दाखवले. दरमहा सव्वा लाख रुपये पगार मिळेल, असे सांगून तिला दुबईला पाठवण्यात आले. मात्र, तिथे पोहोचल्यानंतर तिची फसवणूक झाल्याचे समोर आले. तिच्यावर देहविक्रीसाठी दबाव टाकण्यात आला. तिने नकार दिल्यानंतर पासपोर्ट हिसकावून तिला एका खोलीत डांबण्यात आले आणि पाच लाख रुपयांच्या खंडणीची मागणी करण्यात आली. अखेर केंद्रीय राज्यमंत्री मुरलीधर मोहोळ यांच्या प्रयत्नांतून या महिलेची सुखरूप सुटका झाली असून, ती भारतात परतली आहे.

पतीचे दिव्यांगत्व आणि कुटुंबावरील कर्जामुळे आर्थिक परिस्थिती सुधारण्यासाठी महिलेने परदेशात नोकरी करण्याचे ठरवले होते. याच काळात व्हॉट्सअॅपच्या माध्यमातून तिचा एका एजंटशी संपर्क झाला. त्याने दुबईतील हॉटेलमध्ये नोकरी आणि दरमहा सव्वा लाख रुपये पगार मिळण्याचे आमिष दाखवले. या आश्वासनावर विश्वास ठेवून महिला दुबईला गेली.
मात्र, दुबईत पोहोचल्यानंतर एजंटचा खरा हेतू समोर आला. महिलेवर देहविक्री करण्यासाठी दबाव टाकण्यात आला. तिने त्यास स्पष्ट नकार दिल्यानंतर तिचा पासपोर्ट काढून घेण्यात आला आणि तिला एका खोलीत डांबून ठेवण्यात आले. तसेच तिच्या सुटकेसाठी पाच लाख रुपयांची खंडणी मागण्यात आल्याची माहिती समोर आली आहे.

पीडित महिलेच्या पतीने पुण्यातील जंगली महाराज रस्त्यावरील केंद्रीय राज्यमंत्री मुरलीधर मोहोळ यांच्या जनसंपर्क कार्यालयात धाव घेतली. त्यानंतर मोहोळ यांनी स्वतः परराष्ट्र मंत्रालयाशी संपर्क साधत दुबईतील भारतीय वाणिज्य दूतावासाची मदत मागितली.
महिलेचे ठिकाण शोधून तिच्याशी संपर्क कायम ठेवण्यात आला. त्यानंतर आवश्यक कायदेशीर प्रक्रिया पूर्ण करण्यात आली. तिच्या भारतात परतण्यासाठी विमान तिकिटाचीही व्यवस्था करण्यात आली. अखेर ही महिला मुंबईत दाखल झाली आणि सुखरूप मायदेशी परतली.
या संपूर्ण प्रक्रियेत राहुल तुळपुळे यांच्यासह श्वेता करंदीकर, प्रसाद दातार आणि प्रसाद पाटील यांनीही विशेष प्रयत्न केले.
नोकरीचे आमिष दाखवून महिलांना परदेशात पाठवून त्यांची फसवणूक करणारी टोळी सक्रिय असल्याचा संशय व्यक्त केला जात आहे. या प्रकरणाची सखोल चौकशी व्हावी, यासाठी मुरलीधर मोहोळ यांनी पुणे पोलीस आयुक्तांना पत्र दिले आहे. परदेशात नोकरीसाठी जाताना एजंटची विश्वासार्हता आणि नोकरीसंबंधी कागदपत्रांची पडताळणी करणे आवश्यक आहे. आकर्षक पगाराच्या आमिषाला बळी पडून कोणताही निर्णय घेऊ नये, असे आवाहन या घटनेच्या पार्श्वभूमीवर करण्यात येत आहे.







