मुंबई: लग्नाचे आमिष दाखवून तब्बल १४ तरुणींचे लैंगिक, मानसिक आणि आर्थिक शोषण केल्याचा आरोप असलेल्या आरोपीला संयुक्त अरब अमिरातीमधून (यूएई) भारतात आणण्यात आले आहे. महाराष्ट्र पोलिसांना हवा असलेला मोहम्मद माजिन याचे २० नोव्हेंबर २०२६ रोजी भारतात प्रत्यार्पण करण्यात आले. केंद्रीय अन्वेषण विभाग (CBI), परराष्ट्र मंत्रालय, केंद्रीय गृह मंत्रालय आणि महाराष्ट्र पोलीस यांच्या समन्वयातून ही कारवाई करण्यात आली.

पोलिसांच्या तपासातून समोर आलेल्या माहितीनुसार, आरोपी मोहम्मद माजिन याने मुख्य पीडित तरुणीला लग्नाचे आमिष दाखवून तिच्याशी शारीरिक संबंध प्रस्थापित केले. त्यानंतर तिचे शारीरिक, मानसिक आणि आर्थिक शोषण करत तब्बल १८ लाख रुपयांची फसवणूक केल्याचा आरोप आहे.
या प्रकरणाचा पुढील तपास केला असता, आरोपीने अशाच प्रकारे आणखी १३ महिलांना लग्नाच्या जाळ्यात ओढून त्यांचे शोषण केल्याचे समोर आले. या महिलांकडूनही त्याने मोठ्या प्रमाणावर पैसे उकळल्याचा आरोप आहे. तसेच, त्याने महिलांचे खासगी व्हिडिओ रेकॉर्ड केल्याचा गंभीर आरोपही त्याच्यावर करण्यात आला आहे.

या प्रकरणात गुन्हा दाखल झाल्यानंतर आरोपी मोहम्मद माजिन परदेशात पळून गेला होता. त्याला शोधण्यासाठी महाराष्ट्र पोलिसांनी सीबीआयकडे विनंती केली होती. त्यानंतर सीबीआयच्या इंटरपोल विभागाने आरोपीविरोधात रेड नोटीस जारी केली.
या नोटीसच्या आधारे यूएईच्या अधिकाऱ्यांनी आरोपीचा शोध घेऊन त्याला अटक केली. या प्रकरणात पोलिसांनी यापूर्वीच सक्षम न्यायालयात आरोपपत्र दाखल केले आहे. अटकेनंतर महाराष्ट्र पोलिसांचे विशेष पथक यूएईमध्ये गेले आणि त्यांनी आरोपीचा ताबा घेतला. त्यानंतर २० नोव्हेंबर २०२६ रोजी त्याला भारतात आणण्यात आले.
दरम्यान, सीबीआयने दिलेल्या आकडेवारीनुसार, २०१९ पासून आतापर्यंत इंटरपोलच्या माध्यमातून परदेशात पळून गेलेल्या ३०० हून अधिक फरार आरोपींना भारतात परत आणण्यात यश आले आहे. विशेष म्हणजे, २०२६ या वर्षात आतापर्यंत ७४ फरार आरोपींचे भारतात प्रत्यार्पण करण्यात आले आहे.
या कारवाईमुळे परदेशात पळून गेलेल्या आरोपींचा शोध घेऊन त्यांना कायद्याच्या कक्षेत आणण्यासाठी भारतीय तपास यंत्रणांमधील आंतरराष्ट्रीय समन्वयाचे महत्त्व पुन्हा अधोरेखित झाले आहे.







