पुणे: पुणे मेट्रोच्या वनाझ ते चांदणी चौक या प्रस्तावित विस्तारित मार्गिकेसोबत उभारण्यात येणाऱ्या वाहनांसाठीच्या उड्डाणपुलाची लांबी वाढविण्याचा महत्त्वाचा निर्णय घेण्यात आला आहे. या निर्णयामुळे कचरा डेपोपासूनच दुहेरी उड्डाणपुलाची सुरुवात होण्याची शक्यता निर्माण झाली आहे. त्यामुळे भविष्यात या परिसरातील वाहतूक अधिक सुरळीत करण्यास मदत होईल, अशी अपेक्षा व्यक्त केली जात आहे.
केंद्रीय हवाई वाहतूक राज्यमंत्री आणि पुण्याचे खासदार मुरलीधर मोहोळ यांच्या उपस्थितीत महाराष्ट्र मेट्रो रेल्वे कॉर्पोरेशन (महामेट्रो), पुणे महापालिका आणि कोथरूडमधील नागरिकांच्या प्रतिनिधींमध्ये बैठक पार पडली. या बैठकीत वनाझ ते चांदणी चौक मेट्रो मार्गाच्या आराखड्यावर सविस्तर चर्चा करण्यात आली. चर्चेनंतर उड्डाणपुलाची लांबी सुमारे 200 ते 250 मीटरने वाढविण्याचा निर्णय निश्चित करण्यात आला. याबाबतचा सुधारित आराखडा पुढील 3 ते 4 दिवसांत तयार करून सादर करण्याच्या सूचना महामेट्रोला देण्यात आल्या आहेत.
या मेट्रो मार्गाच्या आराखड्याबाबत कोथरूड सिटीझन फोरमने यापूर्वी अनेक सूचना आणि आक्षेप नोंदवले होते. विशेषतः कोथरूड बस डेपो चौकातील उड्डाणपुलाची लांबी वाढविण्याची मागणी नागरिकांनी सातत्याने लावून धरली होती. त्यानंतर झालेल्या चर्चेत हा प्रस्ताव मान्य करण्यात आला. उड्डाणपुलाच्या वाढीव कामासाठी लागणारा अतिरिक्त खर्च पुणे महापालिका उचलणार असल्याचेही बैठकीत स्पष्ट करण्यात आले.
यापूर्वी या ठिकाणी एकमजली उड्डाणपूल उभारण्याची योजना होती. मात्र मेट्रो विस्तार लक्षात घेऊन आता नल स्टॉपप्रमाणे दुहेरी उड्डाणपूल उभारण्याचा प्रस्ताव पुढे आला आहे. पुणे मेट्रोच्या दुसऱ्या टप्प्यात वनाझ ते चांदणी चौक हा मार्ग पूर्णपणे उन्नत स्वरूपाचा असणार असून त्यावर कोथरूड बस डेपो आणि चांदणी चौक अशी दोन स्थानके असतील. या विस्तारासाठी सुमारे 3,626 कोटी रुपये खर्च अपेक्षित असून, भविष्यातील वाहतुकीचा विचार करून अशाच प्रकारच्या उड्डाणपुलांबाबत इतर मेट्रो मार्गांवरही चर्चा सुरू असल्याची माहिती समोर आली आहे.
