लोणी काळभोर, ता. १ : लोणी काळभोर आणि परिसरातील नागरिकांसाठी आनंदाची बातमी म्हणजे ग्रामपंचायत कार्यालयात शासनमान्य ‘सेतू सुविधा केंद्र’ सुरू करण्यात आले आहे. या केंद्राच्या माध्यमातून उत्पन्न, रहिवासी, जात, अधिवास यांसह विविध शासकीय दाखले आता शासनाने निश्चित केलेल्या शुल्कात थेट गावातच उपलब्ध होणार असल्याने नागरिकांची पुणे किंवा अन्य ठिकाणी होणारी धावपळ कायमची थांबणार आहे.
या सेतू सुविधा केंद्राचे उद्घाटन ३० जून २०२६ रोजी अपर तहसीलदार तृप्ती कोलते-पाटील यांच्या हस्ते करण्यात आले. यावेळी कृषी उत्पन्न बाजार समितीचे संचालक प्रशांत काळभोर, जिल्हा परिषद सदस्या शितल कांबळे, पंचायत समिती सदस्य अमोल टेकाळे, प्रशासक सरपंच नागेश अंकुशराव काळभोर, लोणी काळभोरचे मंडल अधिकारी लक्ष्मण बांडे साहेब, ग्राम महसूल अधिकारी अभिमन्यू करे, ग्रामपंचायत अधिकारी एस.एन.गवारी माजी सरपंच राजाराम काळभोर,राहुल भाऊ काळभोर,साविता लांडगे, उपसरपंच ललिता काळभोर, माजी उपसरपंच आण्णासाहेब ग. काळभोर, राजेंद्र काळभोर, विठ्ठल रामचंद्र काळभोर, राहुल आप्पा काळभोर,सुनील गायकवाड, प्रियांका काळभोर, युवराज काळभोर संतोष भोसले ग्रामपंचायत कर्मचारी आणि ग्रामस्थ मोठ्या संख्येने उपस्थित होते.
यापूर्वी उत्पन्न, रहिवासी, जात, अधिवास यांसारखे महत्त्वाचे शासकीय दाखले मिळविण्यासाठी नागरिकांना तहसील कार्यालय किंवा इतर ठिकाणी वारंवार जावे लागत होते. त्यामुळे वेळेचा अपव्यय, आर्थिक खर्च आणि गैरसोयीला सामोरे जावे लागत होते. आता मात्र एकाच ठिकाणी शासनाच्या नियमांनुसार आणि निश्चित शुल्कात या सेवा उपलब्ध होणार असल्याने नागरिकांचा मोठा वेळ आणि पैसा वाचणार आहे.
ग्रामपंचायतीत सुरू झालेले हे सेतू सुविधा केंद्र डिजिटल आणि पारदर्शक प्रशासनाच्या दिशेने टाकलेले महत्त्वपूर्ण पाऊल मानले जात आहे. यामुळे लोणी काळभोरसह परिसरातील हजारो नागरिकांना शासकीय सेवा अधिक जलद, सुलभ आणि विश्वासार्ह पद्धतीने मिळणार असून, गावपातळीवरच शासनाच्या सुविधा उपलब्ध करून देण्याचा उद्देशही साध्य होणार आहे. स्थानिक नागरिकांनी या उपक्रमाचे स्वागत करत, “गावातच सर्व शासकीय दाखले उपलब्ध होणार असल्याने मोठा दिलासा मिळाला आहे,” अशी भावना व्यक्त केली.
