पुणे: पुण्यातील संगमवाडी परिसरातील एका कॅफेमध्ये वन्यप्राण्यांच्या अवयवांची बेकायदेशीर तस्करी सुरू असल्याचा धक्कादायक प्रकार उघडकीस आला आहे. गुप्त माहितीच्या आधारे पुणे वन विभागाने छापा टाकत दोन तरुणांना अटक केली असून त्यांच्याकडून बिबट्याची कातडी, १५ नखे आणि दोन सुळे जप्त करण्यात आले आहेत.
वन विभागाला कॅफेमध्ये बिबट्याच्या अवयवांची विक्री होणार असल्याची माहिती मिळाली होती. त्यानंतर अधिकाऱ्यांनी साध्या वेशात कॅफेमध्ये सापळा रचला. काही वेळातच दोन संशयित तेथे आले आणि अवयवांची देवाणघेवाण सुरू केली. त्याच वेळी वन विभागाच्या पथकाने कारवाई करून दोघांना ताब्यात घेतले.
अटक करण्यात आलेल्या आरोपींची नावे आदेश रेवजी पारधी (वय २५) आणि शुभम बाळू पारधी (वय २१) अशी असून, दोघेही जुन्नर तालुक्यातील वरखेडे डिंगोरे येथील रहिवासी आहेत. त्यांच्याविरोधात वन्यजीव संरक्षण कायद्यानुसार गुन्हा दाखल करण्यात आला आहे. न्यायालयाने दोघांना चार दिवसांची वनकोठडी सुनावली आहे.
वन विभागाच्या माहितीनुसार, बिबट्या हा वन्यजीव संरक्षण कायद्यातील अनुसूची क्रमांक एकमधील संरक्षित प्राणी आहे. त्यामुळे या गुन्ह्यासाठी दोषी ठरल्यास तीन ते सात वर्षांपर्यंत कारावास आणि दंडाची तरतूद आहे.
या प्रकरणामागे मोठे तस्करीचे जाळे कार्यरत असण्याची शक्यता व्यक्त करण्यात येत असून, इतर संबंधित आरोपींचा शोध सुरू आहे. ही कारवाई उपवनसंरक्षक अभिजीत वायकोस यांच्या मार्गदर्शनाखाली वन विभागाच्या पथकाने केली.
वन्यजीवांच्या अवयवांची बेकायदेशीर तस्करी किंवा संशयास्पद हालचाली आढळल्यास नागरिकांनी वन विभागाच्या १९२६ या हेल्पलाइनवर तात्काळ माहिती द्यावी, असे आवाहन करण्यात आले आहे.
