पुणे : पुणे शहरात आणखी एक कार अपघात झाला आहे. या कार अपघातामध्ये दुचाकीस्वाराचा मृत्यू झाला आहे. एका मर्सिडीज कारखाली चिरडून दुचाकीस्वाराचा मृत्यू झाला आहे. आज मंगळवारी (दि.18) दुपारी एक वाजण्याच्या सुमारास हा अपघात झाला आहे.
येरवड्यातील गोल्फ कोर्स चौकात आलिशान मर्सिडीज बेंज गाडीखाली चिरडून एका दुचाकीस्वाराचा मृत्यू झाला आहे. यावेळी मर्सिडीज बेंजच्या चालकाला ताब्यात घेण्यात आले आहे. या घटनेसंदर्भात येरवडा पोलीस ठाण्यात गुन्हा दाखल करण्याची प्रक्रिया सुरु आहे.
या घटनेतील मृत्युमुखी पडलेल्या दुचाकीस्वाराचे नाव केदार मोहन चव्हाण (वय-41) आहे. तर मर्सिडीज बेंजचा चालक नंदू अर्जुन ढवळे याला पोलीसांनी ताब्यात घेतले आहे.
या घटनेसंदर्भात पोलीसांनी दिलेल्या माहितीनुसार, आज मंगळवारी (दि.18) दुपारी एक वाजण्याच्या सुमारास येरवड्यातील गोल्फ कोर्स चौकातून केदार चव्हाण हे दुचाकीवर जात होते. यावेळी अचानक दुचाकी स्लिप झाल्याने केदार चव्हाण रस्त्यावर पडले. दुचाकी स्लीप झाल्यामुळे पाठीमागून येणारी मर्सिडीज बेंज गाडी त्या दुचाकीस्वाराच्या अंगावर गेली.
यामध्ये गंभीर जखमी झालेले दुचाकीस्वार केदार चव्हाण यांना तातडीने रुग्णालयात नेण्यात आले आहे. मात्र उपचार सुरु असतानाच त्यांचा मृत्यू झाला आहे. या अपघाताची माहिती समजताच येरवडा पोलीसांनी घटनास्थळी धाव घेतली आहे. दरम्यान, आरोपी कारचालकाला ताब्यात घेतले असून या घटनेचा अधिक तपास सुरु आहे,
