Political | पुणे – भाजपाकडून आपला व आपल्या सहकाऱ्यांचा राजकीय घात झाला आहे हे आता एकनाथ शिंदे साहेबांना कळून चुकलंय. अशी माहिती मला शिंदे गटातील माझ्या एका आमदार मित्राने दिली आहे. असे ट्विट राष्ट्रवादी काँग्रेसचे आमदार अमोल मिटकरी यांनी केले आहे. यामुळे राजकीय चर्चांना उधाण आले आहे.
आमदार अमोल मिटकरी नेहमीच कोणत्या ना कोणत्या कारणाने अथवा आपल्या वक्त्यव्यांनी चर्चेत राहत असतात. याआधी शिंदे-फडणवीस सरकारचं काऊंटडाऊन सुरू झाला असल्याचं वक्तव्य मिटकरी यांनी केलं होतं. त्यानंतर लगेचच आता त्यांनी हे ट्विट केलं आहे.
सध्या महाविकास आघाडी आणि शिंदे-फडणवीस सरकार यांचा सत्तासंघर्ष टोकाला गेल्याचं दिसत आहे. राष्ट्रवादीवर जाणीवपूर्वक दबाव टाकून राष्ट्रवादी फोडण्याचा प्रयत्न सुरू असल्याचा आरोप ठाकरे गटाचे खासदार संजय राऊत यांनी केला होता. याबाबत अमोल मिटकरी यांना विचारलं असता त्यांनी राऊतांच्या म्हणण्याशी सहमती दर्शवली होती.
राऊत साहेबांच्या मताशी मी सहमत असून सत्ताधाऱ्यांकडून जाणीवपूर्वक राष्ट्रवादी काँग्रेसवर दबाव टाकून पक्ष फोडण्याचा प्रयत्न केला जात आहे. पण त्यांचा हा प्रयत्न कधीही यशस्वी होणार नाही, असं अमोल मिटकरी यांनी स्पष्ट केलं होत.
