अमित मुंडीक
पुणे: पुणे शहरातील येवलेवाडी पोलीस स्टेशन हद्दीत जुन्या भांडणाच्या वैमनस्यातून एका तरुणाचा निघृण खून केल्याची घटना उघडकीस आली असून, या गंभीर गुन्ह्यातील आरोपींना अवघ्या १२ तासांत अटक करत येवलेवाडी पोलिसांनी धडाकेबाज कामगिरी केली आहे.
येवलेवाडी कमानीच्या पुढे, मिनू मेहता सोसायटीकडे जाणाऱ्या कच्च्या रस्त्यावर आकाश कृष्णा चाबुकस्वार (वय २१, रा. फुरसुंगी, पुणे) याचा रस्ता अडवून जुन्या भांडणाच्या कारणावरून वाद घालण्यात आला. या वादाचे रूपांतर हाणामारीत झाले असून एकूण सात आरोपींनी आकाश चाबुकस्वार यास लाथा-बुक्क्यांनी मारहाण करून त्याच्या डोक्यात दगड घालून अत्यंत निघृणपणे खून केला.
या प्रकरणी येवलेवाडी पोलीस स्टेशन येथे गुन्हा रजिस्टर क्रमांक ०२/२०२६ अंतर्गत भारतीय न्याय संहिता कलम १०३(१), १८९(२), १९०, १९१(२) तसेच महाराष्ट्र पोलीस अधिनियम कलम ३७(१)(३) व १३५ प्रमाणे गुन्हा दाखल करण्यात आला होता. गंभीर गुन्हा करून आरोपी फरार झाल्याने मा. पोलीस उपआयुक्त, परिमंडळ-५ यांच्या आदेशानुसार तात्काळ दोन तपास पथके तयार करण्यात आली.
तपास पथकातील सहायक पोलीस निरीक्षक राकेश जाधव व पोलीस अंमलदार सुजीत मदन यांनी गोपनीय व तांत्रिक माहितीच्या आधारे आरोपी नामे आदित्य सुभाष गायकवाड (वय १९, रा. गोकुळनगर, कोंढवा), गणेश किशोर मोरे (वय २०, रा. कात्रज-कोंढवा) आणि कौशल्य उर्फ ऋषी जनार्धन मारे (वय १९, रा. तुळजाभवानी निवास, कोंढवा) यांना तात्काळ ताब्यात घेतले आहे. उर्वरित आरोपींचा शोध सुरू आहे.
ही कारवाई मा. अपर पोलीस आयुक्त (पूर्व प्रादेशिक विभाग) श्री. मनोज पाटील, मा. पोलीस उपआयुक्त परिमंडळ-५ श्रीमती राजलक्ष्मी शिवणकर, सहायक पोलीस आयुक्त वानवडी विभाग श्रीमती नम्रता देसाई तसेच वरिष्ठ पोलीस निरीक्षक श्री. अमर काळंगे यांच्या मार्गदर्शनाखाली करण्यात आली. या यशस्वी कारवाईत सहायक पोलीस निरीक्षक राकेश जाधव यांच्यासह येवलेवाडी पोलीस स्टेशनच्या अधिकारी व अंमलदारांनी मोलाची भूमिका बजावली.
