पिंपरी, (पुणे) : पिंपरी-चिंचवड शहर पोलीस दलातील ३९४ पोलिसांना बाप्पांच्या आगमनादिवशीच मिळाली पदोन्नत्ती! पिंपरी-चिंचवड शहर पोलीस दलातील ३९४ पोलिसांना बाप्पांच्या आगमनादिवशीच पदोन्नत्ती मिळाली आहे. ३९० जणांना पोलीस शिपाई, नाईकपदावरुन हवालदार, तर चार अंमलदारांना पोलीस उपनिरीक्षक पदावर बढती मिळाली आहे. याबाबतचे आदेश पोलीस आयुक्त विनयकुमार चौबे यांनी काढले आहेत. यामुळे गणरायाने आगमनादिवशीच ‘गोड’ प्रसाद दिल्याची भावना पेलीस कर्मचाऱ्यांनी व्यक्त केली.
पिंपरी-चिंचवड पोलीस आयुक्तालयात गेली पाच वर्षांपासून मनुष्यबळाची कमतरता जाणवत आहे. पोलीस शिपाई पदासाठी दोन वेळा भरती झाली. इतर जिल्ह्यांतून बदलीवर येणारे, पोलीस भरतीमधून मिळालेल्या पोलिसांना घेऊन कसाबसा गाडा हाकला जात आहे. विविध सण, अतिमहत्वाच्या नेत्यांच्या दौऱ्यावेळी आयुक्तालयाला बाहेरून अधिकची कुमक मागवावी लागते.
बंदोबस्तासह घडणाऱ्या गुन्ह्यांच्या तपासासाठी देखील राखीव मनुष्यबळ ठेवावे लागते. या पार्श्वभूमीवर पोलीस आयुक्तांनी ३९४ जणांना बढती दिली. पोलीस दलात २५ मे २००४ पूर्वी रुजू झालेल्यांना सेवा ज्येष्ठतेनुसार बढती मिळाली आहे. पोलीस शिपाई आणि नाईक पदावरून ३९० जणांना हवालदारपदी, तर पोलीस दलात ३० वर्षे सेवा पूर्ण करणारे, सहायक पोलीस उपनिरीक्षक पदावर किमान तीन वर्षे सेवा पूर्ण करणाऱ्या चार जणांना पोलीस उपनिरीक्षक पदावर बढती दिली आहे.
मनोज बनसोड, ज्ञानेश्वर पोटे, वाहतूक शाखेतील गजेंद्र जाधवर आणि वाकड पोलीस ठाण्यातील अरुण भालेराव यांना ही बढती मिळाली आहे.पोलिसांना सर्वसाधारपणे एका पदावर दहा वर्षे सेवा कालावधी झाल्यानंतर पदोन्नती मिळते. पोलीस शिपाई पदावर भरती झालेल्यांना पोलीस उपनिरीक्षक होण्यासाठी वयाच्या अडचणी येतात. त्यामुळे त्यांचे अधिकारी होण्याचे स्वप्न अपूर्णच राहते.
दरम्यान, पोलीस दलातील पदोन्नती साखळीतील पोलीस नाईक हे पद गृह विभागाने रद्द केले. सध्या कार्यरत असलेले पोलीस शिपाई, नाईक या दोन्ही संवर्गातील पोलिसांना हवालदार पदावर बढती दिली जात आहे.
