पिंपरी (पुणे) : हळदी समारंभ झाल्यानंतर जेवणाच्या पंगतीतून जाऊ न दिल्याने टोळक्याने राडा घालत नवरदेवावर कोयत्याने वार केले. ‘‘आम्ही येथील भाई आहोत, आमच्या नादाला लागले तर तुमची विकेट टाकीन’’, अशी धमकी देत तिघांनी दहशत पसरवून राडा घातला. ही घटना जय भवानी चौक, श्रीनगर रहाटणी येथे घडली. या प्रकरणी वाकड पोलीस ठाण्यात गुन्हा दाखल करण्यात आला असून, पोलिसांनी आरोपींना अटक केली आहे.
विजय राहुल तलवारे (वय २२, रा. काळेवाडी), सनी राजीव गायकवाड (वय २३, रा. पिंपरी), अनिकेत बापू बनसोडे (वय २४, रा. पिंपरी) अशी अटक केलेल्या आरोपींची नावं आहेत. याप्रकरणी रोहित प्रकाश गायकवाड (वय २९, रा. श्रीनगर, रहाटणी) यांनी वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रोहित गायकवाड यांचा शुक्रवारी सायंकाळी हळदी समारंभ होता. हळदी समारंभ झाल्यानंतर पाहुणे मंडळी जेवण करण्यासाठी बसले होते. त्यावेळी तिघेजण पंगतीमधून सतत ये जा करत होते. त्यामुळे रोहित यांनी त्या तिघांना पंगतीमधून ये जा करण्यास मनाई केली. यातून वाद झाल्याने आरोपी आणि फिर्यादी यांच्यात बाचाबाची झाली.
त्यांनतर काही वेळाने आरोपी कोयता आणि रॉड घेऊन आले. विजय तलवारे याने रोहित यांचा मामे भाऊ शक्ती बनसोडे याच्यावर वार करण्याचा प्रयत्न केला. त्यावेळी रोहित यांनी शक्ती यांना ढकलले. दरम्यान, कोयत्याचा वार रोहित यांच्या हातावर झाला. रोहित या हल्ल्यात गंभीर जखमी झाला. त्यानंतर आरोपींनी कोयता आणि रॉड हवेत फिरवून ‘आम्ही इथले भाई आहोत. आमच्या नादाला लागले तर तुमची विकेट काढीन’ अशी धमकी देत दहशत निर्माण केली. या प्रकरणी वाकड पोलीस ठाण्यात गुन्हा दाखल करण्यात आला असून अधिक तपास पोलीस करत आहेत.
