पिंपरी-चिंचवड: पिंपरी-चिंचवडमधील आकुर्डी परिसरातून एक धक्कादायक घटना समोर आली आहे. एका रिक्षाचालकाने स्वतःच्या ऑटो रिक्षामध्ये गळफास घेऊन आत्महत्या केल्याची घटना उघडकीस आली असून, या घटनेमुळे परिसरात हळहळ व्यक्त केली जात आहे.
मृत रिक्षाचालकाचे नाव प्रमोद साळुंखे (वय अंदाजे ३२) असे असून, ते चाकणमधील आंबेठाण परिसरातील रहिवासी होते. मिळालेल्या माहितीनुसार, आकुर्डी येथील सुखवानी हेरिटेज इमारतीसमोर उभ्या असलेल्या रिक्षामध्ये त्यांचा मृतदेह आढळून आला. सकाळच्या सुमारास रिक्षामध्ये संशयास्पद अवस्थेत व्यक्ती दिसताच नागरिकांनी तातडीने निगडी पोलिसांना माहिती दिली.
घटनास्थळी दाखल झालेल्या पोलिसांनी पंचनामा केला असता, प्रमोद साळुंखे यांनी स्वतःच्या शर्टाच्या सहाय्याने रिक्षामध्ये गळफास घेतल्याचे प्राथमिक तपासात समोर आले. ही घटना मध्यरात्रीच्या सुमारास घडली असावी, असा अंदाज पोलिसांनी व्यक्त केला आहे.
त्यानंतर मृतदेह शवविच्छेदनासाठी पिंपरी येथील यशवंतराव चव्हाण स्मृती रुग्णालयात पाठवण्यात आला. या प्रकरणी निगडी पोलिसांनी आकस्मिक मृत्यूची नोंद करून पुढील तपास सुरू केला आहे.
दरम्यान, प्रमोद साळुंखे यांनी आत्महत्येसारखे टोकाचे पाऊल का उचलले, याचे नेमके कारण अद्याप स्पष्ट झालेले नाही. कौटुंबिक, आर्थिक किंवा अन्य कोणत्या कारणामुळे त्यांनी हा निर्णय घेतला, याचा सर्व बाजूंनी तपास सुरू असल्याची माहिती पोलिसांनी दिली आहे.
या दुर्दैवी घटनेमुळे साळुंखे कुटुंबावर दुःखाचा डोंगर कोसळला असून, परिसरात शोक व्यक्त केला जात आहे.
