पिंपरी-चिंचवड : पिंपरीचिंचवडमधून धक्कादायक बातमी समोर आली आहे. येथे 50 हजार रुपयांमध्ये मुलगा विकत न दिल्याने त्याचे अपहरण केल्याची घटना उघडकीस आली आहे. अपहरण झाल्यानंतर काही तासातच अपहरणकर्त्याकडून 8 वर्षीय चिमुकल्याची सुटका करण्यात खंडणी विरोधी पथकाला यश आलं आहे. यासंबंधित 31 मार्च रोजी आठ वर्षीय चिमुकल्याचे अपहरण एका ओळखीच्या व्यक्तीने केल्याची फिर्याद चिंचवड पोलीस ठाण्यात देण्यात आली होती. गजानन सुपडा पानपाटील असं अटक करण्यात आलेल्या आरोपीचे नाव आहे.
अपहरण प्रकरणी 1 एप्रिल रोजी चिंचवड पोलिस ठाण्यात तक्रार नोंदवल्यानंतर पिंपरी पोलिसांनी अनेक सीसीटीव्ही फुटेज चेक करून, रेल्वे सुरक्षा दलाच्या सहाय्याने अपहरण झालेल्या मुलाची सुखरूप सुटका केली. त्यानंतर त्याला आईच्या स्वाधीन करण्यात आलं.
मुलगा 50 हजार रुपयांमध्ये विकत दे; आरोपीची मागणी
पिंपरी पोलिसांनी दिलेल्या माहितीनुसार, आरोपी गजानन पानपाटील हा मागच्या चार दिवसांपूर्वी चिंचवडमध्ये ओळखीच्या व्यक्तीकडे आला होता. त्यानंतर आरोपी गजाननने त्यांच्या 8 वर्षीय चिमूकल्यासोबत बिस्किट व चॉकलेट देत ओळख वाढवली. दरम्यान त्याच्या ओळखीच्या व्यक्तीच्या पत्नीला तुझा मुलगा 50 हजार रुपयांमध्ये विकत दे अशी मागणी केली. मात्र, महिलेने यास नकार दिला. तरी देखील विकत घेण्याबाबत आरोपी गजानन हट्ट करत होता. त्याने 31 मार्च ला पती-पत्नी कामावर गेल्यानंतर त्यांच्या 8 वर्षीय मुलाचे आरोपी गजाननने अपहरण केले. त्यानंतर त्याला घेऊन तो चाळीसगावला गेला.
या प्रकरणाबाबत पोलिसांना माहिती मिळताच खंडणी विरोधी पथकाचे पोलीस निरीक्षक देवेंद्र चव्हाण यांनी तपास करायला सुरवात केली. भुसावळ पोलीस, रेल्वे सुरक्षा बल, चाळीसगाव पोलीस ठाणे यांची मदत घेऊन अपहरणकर्ता गजाननचे मुलासह सीसीटीव्ही फुटेज पाठवल्यानंतर अखेर आरोपीला चाळीसगाव येथील रेल्वेमधून ताब्यात घेण्यात आले. 50 हजार रुपयांना 8 वर्षीय मुलगा विकत न दिल्याने गजानन पानपाटीलने अपहरण केल्याची कबूल पोलिसांना दिली. याबाबत अधिक तपास पोलीस करत आहेत.
