लोणावळा, (पुणे) : लोणावळा रेल्वे स्थानकावर 12 जानेवारी रोजी रेल्वे रोको आंदोलन करण्यात येणार आहे. अनेक रेल्वे गाड्यांचा लोणावळा स्थानकावरील थांबा बंद केल्याच्या तसेच पुणे-लोणावळा लोकलच्या फेऱ्या वाढविण्याच्या मागणीसाठी लोणावळा शहर बंद ठेवण्याची हाक नागरिकांनी दिली आहे.
दरम्यान, करोनाची साथ येण्यापूर्वी लोणावळा रेल्वे स्थानकावर अनेक एक्सप्रेस रेल्वे गाड्यांना थांबा दिला जात होता. मात्र, कोरोना काळात अनेक गाड्यांचा थांबा रद्द करण्यात आला होता. कोरोना गेला तरी हा निर्णय प्रशासनाने रद्द केला नाही, यामुळे प्रवाशांची गैरसोय होत आहे. म्हणून कोरोना कालावधीपूर्वी थांबणाऱ्या रेल्वे गाड्यांना पुन्हा थांबा द्यावा, अशी मागणी नागरिकांकडून होत आहे.
तसेच कोरोना कालावधीपूर्वी लोणावळा-पुणे दरम्यान लोकलच्या ४८ फेऱ्या सुरु होत्या. त्या देखील कोरोना कालावधीनंतर कमी केल्या आहेत. या लोकल फेऱ्या नियमित सुरु कराव्यात, अशीही मागणी नागरिकांकडून केली जात आहे. लोकल फेऱ्या कमी केल्यामुळे शहरातील नागरिक, विद्यार्थी यांसह देश-विदेशातून येणाऱ्या पर्यटकांना नाहक त्रास सहन करावा लागत आहे.
लोणावळा हे प्रसिद्ध पर्यटन स्थळ आहे. देशातील 75 रेल्वे स्थानकांचा अमृत योजनेंतर्गत विकास केला जाणार आहे. यामध्ये लोणावळा रेल्वे स्थानकाचा देखील समावेश आहे. जर इथे रेल्वे गाड्या थांबणार नसतील. लोकल फेऱ्या वाढणार नसतील तर स्थानकाचे रुपडे पालटून उपयोग काय, असा सवाल नागरिकांकडून केला जात आहे. या पार्श्वभूमीवर बारा जानेवारी रोजी सकाळी नागरिकांकडून रेल्वे रोको आंदोलनाचा इशारा देण्यात आला आहे. तसेच प्रशासनाचा निषेध नोंदवण्यासाठी लोणावळा शहर बंद ठेवण्याची हाक देखील नागरिकांनी दिली आहे.
