पिंपरी: आळंदी येथे शाळा (Pune Crime) सोडल्याचा बनावट दाखला आणि (Pimpri-Chinchwad News) आधारकार्ड तयार करून वय २१ वर्षे पूर्ण असल्याचे भासवत लग्न (Alandi News) केल्याचा प्रकार उघडकीस आला आहे. या प्रकरणी दोघांविरोधात आळंदी पोलीस ठाण्यात गुन्हा दाखल करण्यात आला आहे. ही घटना आळंदी येथील अलंकापुरी मंगल कार्यालयात २२ ऑक्टोबर २०२५ रोजी घडली. (Latest Marathi News)
इंदापूर तालुक्यातील एका ४८ वर्षीय व्यक्तीने या प्रकरणी १२ डिसेंबर रोजी आळंदी पोलीस ठाण्यात फिर्याद दिली. त्यानुसार प्रमोद अभिमन्यू केकाण आणि विशाल सुभाष डोईफोडे (दोघे रा. डाळज नं. २, ता. इंदापूर, जि. पुणे) यांच्या विरोधात गुन्हा नोंदवण्यात आला आहे. पोलिसांनी भारतीय न्याय संहिता बीएनएस कलम ३१८(२), ३३६(३), ३४०(२), ३(५) तसेच बालविवाह प्रतिबंध अधिनियम २००६ मधील कलम १० आणि ११ अंतर्गत गुन्हा दाखल केला आहे.
आळंदीचे वरिष्ठ पोलीस निरीक्षक भीमा नरके यांनी दिलेल्या माहितीनुसार, प्रमोद केकाण याचे प्रत्यक्ष वय २१ वर्षे पूर्ण झालेले नसतानाही त्याने शाळा सोडल्याचा दाखला आणि आधारकार्ड बनावट पद्धतीने तयार केले. या कागदपत्रांमध्ये वय २१ वर्षे पूर्ण असल्याचे दाखवण्यात आले होते. हे बनावट कागदपत्रे आळंदी येथील अलंकापुरी मंगल कार्यालयात सादर करून त्याने फिर्यादी यांच्या मुलीसोबत लग्न केले.
या प्रकारात प्रमोद केकाण आणि विशाल डोईफोडे यांनी संगनमताने फिर्यादी यांची मुलगी तसेच मंगल कार्यालयाचे मालक कानिफनाथ राऊत यांची फसवणूक केल्याचे पोलिस तपासात समोर आले आहे. या प्रकरणाचा पुढील तपास पोलीस उपनिरीक्षक कुमार गिरीगोसावी करत आहेत.
