अमित मुंडीक
पुणे: पुणे शहरातील (Pune Crime) वानवडी पोलीस ठाण्याच्या हद्दीत जेष्ठ (Pune News) नागरिकाला निर्जन रस्त्यावर गाठून मारहाण करत सोनसाखळी लुटणाऱ्या आरोपीस वानवडी पोलिसांनी जेरबंद केले आहे. (Latest Marathi News)
दि. १२ डिसेंबर २०२५ रोजी रामटेकडी इंडस्ट्रियल एरिया, हडपसर येथील टेकडीजवळील निर्जन रस्त्यावर चार अनोळखी आरोपींनी एका वयोवृद्ध इसमास अडवून त्यांना हाताने मारहाण केली व त्यांच्या गळ्यातील सुमारे १५ ग्रॅम वजनाची सोन्याची साखळी जबरदस्तीने हिसकावून मोटारसायकलवरून फरार झाले होते.
याप्रकरणी वयोवृद्ध नागरिकांनी दिलेल्या फिर्यादीवरून वानवडी पोलीस ठाण्यात गुन्हा दाखल करण्यात आला होता. तपासादरम्यान सीसीटीव्ही फुटेज व गोपनीय बातमीदारांच्या मदतीने दि. १८ डिसेंबर २०२५ रोजी गंगा सॅटेलाईट सोसायटीजवळील निर्जन ठिकाणी संशयित आरोपी उमर नूर खान (वय १८, रा. कोंढवा) यास शिताफीने ताब्यात घेण्यात आले.
त्याच्या अंगझडतीत सुमारे १५ ग्रॅम वजनाची सोन्यासारखी दिसणारी पिवळ्या धातूची साखळी तसेच गुन्ह्यात वापरलेली दुचाकी जप्त करण्यात आली असून आरोपीने गुन्ह्याची कबुली दिली आहे. ही कारवाई वरिष्ठ अधिकाऱ्यांच्या मार्गदर्शनाखाली वानवडी पोलीस ठाण्याच्या तपास पथकाने केली आहे. उर्वरित आरोपींचा शोध सुरू असल्याची माहिती पोलिसांनी दिली आहे.
