Pune Crime: पुणे: पुणे (Pune) शहरातील पिंपरी-चिंचवड भागात पुन्हा एकदा मद्यधुंद अवस्थेत झालेल्या वादातून हिंसाचाराची घटना समोर आली आहे. निगडी परिसरातील यमुनानगर येथे एका तरुणाला मित्रानेच बेदम मारहाण केल्याची धक्कादायक घटना घडली आहे. केवळ मित्राला शांत राहण्याचा सल्ला दिल्यामुळे तरुणावर जीवघेणा हल्ला (Attack) करण्यात आला. या प्रकरणी निगडी पोलीस ठाण्यात गुन्हा दाखल करण्यात आला असून जखमी तरुणाने तक्रार दिली आहे. Pune Crime
मिळालेल्या माहितीनुसार रोहित सुनील चव्हाण वय २४ हा तरुण मंगळवारी रात्री साडेआठच्या सुमारास आपल्या काही मित्रांसोबत यमुनानगर येथील बालाजी ग्राऊंडजवळ उभा होता. त्याच वेळी त्याचा मित्र पृथ्वी गायकवाड हा दारूच्या नशेत मोठ्याने आरडाओरडा करत परिसरातील शांतता भंग करत होता. रोहितने मित्र म्हणून त्याला समजावण्याचा प्रयत्न केला आणि शांत बसण्याचा सल्ला दिला. मात्र ही गोष्ट पृथ्वीला आवडली नाही.
रागाच्या भरात पृथ्वीने रोहितची गचांडी धरली आणि त्याच्या डोक्यात लोखंडी पंचने वार केले. शिवीगाळ करत त्याला ओढत मैदानाबाहेर नेण्यात आले. या वेळी पृथ्वीचा भाऊ यश गायकवाड घटनास्थळी आला. त्याने जमिनीवर पडलेला दगड उचलून रोहितच्या डोक्यात मारला. या हल्ल्यात रोहित गंभीर जखमी झाला.
भरवस्तीत घडलेल्या या प्रकारामुळे परिसरात काही काळ तणावाचे वातावरण निर्माण झाले होते. स्थानिक नागरिकांनी जखमी रोहितला तातडीने उपचारासाठी रुग्णालयात दाखल केले. घटनेनंतर रोहितने निगडी पोलीस ठाण्यात तक्रार दाखल केली.
पोलिसांनी दिलेल्या माहितीनुसार पृथ्वी गायकवाड आणि यश गायकवाड दोघेही राहणार ओटास्कीम निगडी यांच्याविरोधात मारहाणीचा गुन्हा नोंदवण्यात आला आहे. दारूच्या नशेत मित्रच मित्रावर हल्ला केल्याने परिसरात चर्चा सुरू असून या प्रकरणाचा पुढील तपास निगडी पोलीस करत आहेत.
