पुणे: महाराष्ट्राची कुलदैवत मानल्या जाणाऱ्या कार्ला आई (Ekvira Devi Karla) एकवीरादेवी देवस्थान ट्रस्टमध्ये गंभीर गैरव्यवहार सुरू असल्याचा आरोप येथील पुजारी(Karla Devi Temple) गणेश देशमुख यांनी पत्रकार परिषदेत केला आहे. देवस्थान ट्रस्टचे अध्यक्ष दीपक हुलावळे यांच्यावर (Ekvira Devi Mandir) कोट्यवधी रुपयांची अफरातफर केल्याचा, देवस्थानच्या गाड्या खासगी तसेच राजकीय वापरासाठी वापरल्याचा, तसेच देवीला दान स्वरूपात मिळालेल्या सोन्या-चांदीच्या वस्तूंवर डल्ला मारल्याचा गंभीर आरोप करण्यात आला आहे. (Latest Marathi News)
पुजारी गणेश देशमुख यांनी सांगितले की, भाविकांकडून देवीसाठी मिळणारे दान पारदर्शकपणे हाताळले जात नसून, काही मौल्यवान वस्तूंची नोंदच नसल्याचा संशय आहे. याशिवाय व्हीआयपी दर्शनाच्या नावाखाली बनावट पावत्या छापून भाविकांकडून रोखीने पैसे उकळले जात असल्याचा धक्कादायक दावा त्यांनी केला आहे. देवस्थान ट्रस्टकडे असलेली इनोव्हा आणि फॉर्च्युनर या गाड्या देवस्थानाच्या कामासाठी न वापरता वैयक्तिक आणि राजकीय कारणांसाठी वापरल्या जात असल्याचेही त्यांनी स्पष्ट केले.
या सर्व प्रकरणाबाबत पुजारी गणेश देशमुख यांनी पुणे धर्मदाय आयुक्त कार्यालयाकडे लेखी तक्रार दाखल केली असून, या तक्रारीमुळे कार्ला परिसरात मोठी खळबळ उडाली आहे. भाविकांमध्येही देवस्थानच्या कारभाराबाबत नाराजी व्यक्त केली जात आहे.
दरम्यान, या आरोपांना ट्रस्ट अध्यक्ष दीपक हुलावळे यांनी ठामपणे नाकारले आहे. माझ्यावर करण्यात आलेल्या आरोपांबाबत मला अद्याप कोणतीही अधिकृत माहिती मिळालेली नाही. सध्या निवडणुका सुरू असल्यामुळे काहीजण मुद्दाम आरोप करत आहेत. योग्य वेळी पुराव्यानिशी माध्यमांसमोर आपली भूमिका मांडेन, असे स्पष्टीकरण त्यांनी दिले आहे.
एकीकडे देवस्थानच्या कारभारावर गंभीर प्रश्न उपस्थित झाले असताना, दुसरीकडे ट्रस्ट अध्यक्षांनी सर्व आरोप फेटाळून लावल्याने या प्रकरणाला वेगळे वळण मिळाले आहे. आता या आरोपांवर प्रशासन आणि सरकार कोणती भूमिका घेतात, तसेच पुणे धर्मदाय आयुक्त कार्यालयाकडून काय कारवाई केली जाते, याकडे भाविकांसह संपूर्ण महाराष्ट्राचे लक्ष लागले आहे.
