MIM Two Groups Clash: छत्रपती संभाजीनगर : छत्रपती संभाजीनगर (Chhatrapati Sambhajinagar) शहरात महापालिका निवडणुकांच्या पार्श्वभूमीवर राजकीय वातावरण तापू लागले असतानाच एक धक्कादायक घटना समोर आली आहे. शहरातील किराडपुरा भागात एमआयएम पक्षाच्या दोन गटांमध्ये उमेदवारीच्या कारणावरून जोरदार हाणामारी झाली. या घटनेमुळे परिसरात काही काळ तणाव निर्माण झाला असून पोलिसांचा मोठा बंदोबस्त तैनात करण्यात आला आहे. MIM Two Groups Clash Video
(हेही वाचा- खेडशिवापूर परिसरात जुगार अड्ड्यावर राजगड पोलिसांची धडक कारवाई; २७ हजारांची रोकड जप्त)
संभाजीनगर महापालिकेच्या प्रभाग क्रमांक 12 मधील उमेदवारीवरून हा वाद उफाळून आला. एमआयएम पक्षाने या प्रभागातून मोहम्मद इसरार यांना अधिकृत उमेदवार घोषित केले. या निर्णयामुळे इसरार यांच्या समर्थकांमध्ये आनंदाचे वातावरण होते, तर दुसऱ्या गटातील कार्यकर्त्यांमध्ये नाराजी पसरली. उमेदवारी जाहीर झाल्यानंतर मोहम्मद इसरार यांच्या समर्थकांनी आनंद व्यक्त करण्यासाठी शहरात रॅली काढली.
ही रॅली वाजतगाजत किराडपुरा परिसरात पोहोचली. याच प्रभागातून हाजी इसाक हे देखील निवडणूक लढवण्यास इच्छुक होते. रॅली किराडपुरात येताच हाजी इसाक यांच्या समर्थकांनी ती अडवली आणि जोरदार घोषणाबाजी सुरू केली. सुरुवातीला दोन्ही गटांमध्ये शाब्दिक वाद झाला. काही वेळातच हा वाद वाढत गेला आणि परिस्थिती हाताबाहेर गेली.
दोन्ही गटांतील कार्यकर्ते एकमेकांवर धावून गेले आणि भररस्त्यात तुंबळ हाणामारी सुरू झाली. या गोंधळात हाजी इसाक यांच्या कार्यकर्त्यांनी मोहम्मद इसरार यांनाही मारहाण केल्याचा आरोप आहे. इसरार यांच्या गळ्यातील हार तोडण्यात आल्याची माहिती समोर आली आहे. इसरार यांच्या समर्थकांनी मध्ये पडताच दोन्ही बाजूंनी जोरदार मारहाण झाली.
घटनेची माहिती मिळताच पोलिसांनी तातडीने घटनास्थळी धाव घेत गर्दी पांगवली. सध्या किराडपुरा परिसरातील परिस्थिती नियंत्रणात असली तरी तणावपूर्ण वातावरण कायम आहे. एकाच पक्षातील दोन गटांमध्ये उघडपणे झालेल्या या वादामुळे एमआयएम पक्षातील अंतर्गत गटबाजी चव्हाट्यावर आली असून पुढील काळात राजकीय हालचालींवर याचा परिणाम होण्याची शक्यता व्यक्त केली जात आहे.
