विशाल शिंदे
भोर : राजगड पोलीस स्टेशनच्या हद्दीत वाढत चाललेल्या (Khed Shivapur News) अवैध धंद्यांवर आळा घालण्यासाठी पोलिसांकडून कारवाया सुरू असल्या तरी (Pune Crime) प्रत्यक्षात हायवे लगत व ग्रामीण भागात अजूनही दोन नंबरचे धंदे बिनधास्त सुरू असल्याचे चित्र समोर येत आहे. याच पार्श्वभूमीवर खेडशिवापूर परिसरात सुरू असलेल्या जुगार अड्ड्यावर राजगड पोलिसांनी धडक कारवाई करत दोन जणांना रंगेहाथ पकडले असून त्यांच्याकडून २७ हजार रुपये रोख रक्कम व जुगाराचे साहित्य जप्त करण्यात आले आहे. (Latest Marathi News)
ही कारवाई दि. २६ डिसेंबर २०२५ रोजी सायंकाळी सुमारे सहा वाजता खेडशिवापूर (ता. हवेली, जि. पुणे) येथील कोंढणपूर फाटा परिसरात, मुक्तांगण हॉटेलच्या पाठीमागील मोकळ्या जागेत असलेल्या पत्र्याच्या शेडमध्ये करण्यात आली. पोलिसांना मिळालेल्या गोपनीय माहितीच्या आधारे छापा टाकण्यात आला असता जुगार खेळवला जात असल्याचे स्पष्ट झाले.
या कारवाईत बसवराज तुकाराम भुसारे (रा. पिंपरी-चिंचवड) हा राजु किसन कोंडे (रा. खेडशिवापूर) याच्या सांगण्यावरून स्वतःच्या आर्थिक फायद्यासाठी जुगार खेळवत असल्याचे निष्पन्न झाले. आरोपींकडे विशिष्ट आकडे असलेले चार्ट असून, त्याच्या आधारे आकडे देत जुगार खेळवला जात असल्याचे तपासात उघड झाले. छाप्यात २७ हजार रुपये रोख रक्कम व जुगाराचे साहित्य पोलिसांनी ताब्यात घेतले आहे. संबंधितांवर महाराष्ट्र जुगार कायद्यानुसार कारवाई करण्यात आली असून पुढील तपास राजगड पोलीस स्टेशन करत आहे.
मात्र या एका कारवाईपुरतेच समाधान मानून चालणार नाही, अशी तीव्र प्रतिक्रिया आता स्थानिक नागरिकांकडून व्यक्त होत आहे. राजगड पोलीस स्टेशनच्या हद्दीत हायवेच्या लगत तसेच काही ग्रामीण भागांमध्ये जुगार, अवैध व्यवसाय व इतर दोन नंबरचे धंदे मोठ्या प्रमाणात सुरू असल्याचा आरोप नागरिक करत आहेत. विशेषतः हायवे परिसरात मोकळ्या जागा, हॉटेलच्या पाठीमागे व तात्पुरत्या शेडमध्ये असे धंदे खुलेआम सुरू असल्याने कायदा व सुव्यवस्थेचा प्रश्न गंभीर बनत आहे.
“एक-दोन कारवायांपुरते मर्यादित न राहता राजगड पोलीस स्टेशनने या अवैध धंद्यांवर कायमस्वरूपी आणि कठोर आळा घालावा. हायवे पट्ट्यात सुरू असलेल्या सर्व दोन नंबरच्या धंद्यांचे विशेष सर्वेक्षण करून त्यांचा समूळ नायनाट करावा,” अशी ठाम मागणी नागरिकांकडून होत आहे.
या गंभीर परिस्थितीची पोलीस अधीक्षक कार्यालयाने तातडीने दखल घ्यावी आणि राजगड पोलीस स्टेशनच्या हद्दीतील अवैध धंद्यांबाबत ठोस, व्यापक व परिणामकारक कारवाईचे आदेश द्यावेत, अशी अपेक्षा नागरिक व्यक्त करत आहेत. अन्यथा भविष्यात सामाजिक गुन्हेगारी वाढण्याची शक्यता नाकारता येणार नाही, अशी चिंता व्यक्त होत आहे.
