पुणे: पुणे आणि पिंपरी-चिंचवडमधील रोजगाराच्या शोधात असलेल्या तरुणांसाठी आनंदाची बातमी आहे. पुणे महानगर परिवहन महामंडळाच्या (पीएमपीएमएल) ताफ्यात लवकरच 1,500 नवीन बसगाड्यांचा समावेश होणार असून, या बससेवेचे संचालन करण्यासाठी 4 हजार चालक आणि वाहकांची कंत्राटी पद्धतीने भरती करण्यात येणार आहे.
या भरती प्रक्रियेत 2 हजार चालक आणि 2 हजार वाहकांची पदे भरली जाणार आहेत. त्यामुळे मोठ्या प्रमाणावर रोजगाराच्या संधी उपलब्ध होणार असून, अनेक सुशिक्षित बेरोजगार तरुणांना नोकरीची संधी मिळणार आहे.
पुणे आणि पिंपरी-चिंचवड शहरांचा झपाट्याने विस्तार होत असून सार्वजनिक वाहतुकीचा वापर करणाऱ्या प्रवाशांची संख्याही सातत्याने वाढत आहे. वाढत्या मागणीच्या तुलनेत काही मार्गांवर बसगाड्यांची संख्या अपुरी पडत असल्याने पीएमपीएमएलने चालू वर्षात 1,500 नवीन बस खरेदी करण्याचा निर्णय घेतला आहे.
नवीन बस ताफ्यात दाखल झाल्यानंतर त्यांचे नियमित आणि प्रभावी संचालन करण्यासाठी अतिरिक्त मनुष्यबळाची आवश्यकता भासणार आहे. यासाठी महामंडळाने 4 हजार चालक-वाहकांच्या भरतीची प्रक्रिया सुरू केली आहे. भरतीसाठी आवश्यक निविदा प्रक्रिया पूर्ण झाली असून, कर्मचाऱ्यांच्या नियुक्तीसाठी एजन्सी निवडण्याचे काम अंतिम टप्प्यात असल्याची माहिती देण्यात आली आहे. एजन्सीची नियुक्ती झाल्यानंतर प्रत्यक्ष भरती प्रक्रियेला गती मिळणार आहे.
पीएमपीएमएलचे अध्यक्ष आणि व्यवस्थापकीय संचालक महेश आव्हाड यांनी सांगितले की, पुणेकरांना अधिक चांगली, सुरक्षित आणि वेळेवर सार्वजनिक वाहतूक सेवा देण्यासाठी नवीन बस ताफ्यात समाविष्ट करण्यात येत आहेत. या बसचे सुरळीत संचालन होण्यासाठी चालक आणि वाहकांची संख्या वाढविणे आवश्यक असल्याने ही भरती करण्यात येत आहे.
नवीन कर्मचाऱ्यांच्या नियुक्तीनंतर बसफेऱ्यांची संख्या वाढण्यास मदत होईल. त्यामुळे प्रवाशांना बसची वाट पाहण्यात कमी वेळ जाईल आणि सार्वजनिक वाहतूक सेवा अधिक कार्यक्षम होईल. या उपक्रमामुळे एकीकडे पीएमपीएमएलच्या सेवेचा दर्जा उंचावणार आहे, तर दुसरीकडे 4 हजार तरुणांसाठी रोजगाराचे नवे दरवाजे उघडणार आहेत.
